भावना राउतले सोधिन्– सत्ता र निर्णयको कुर्सीमा फेरि सहरका ब्रान्डेड अनुहार मात्र?

सेतोपाटी संवाददाता

काठमाडौं, पुस १५

नयाँ राजनीतिक दलहरूले नै 'शक्तिशाली' हरूदेखि आफन्तसम्मलाई समानुपातिक सूचीमा राखेपछि जेनजी आन्दोलनका प्रतिनिधिहरूले विरोध गरेका छन्।

जेनजी प्रतिनिधि भावना राउतले सामाजिक सञ्जाल फेसबुकमार्फत आफ्नो धारणा सार्वजनिक गर्दै समानुपातिक प्रणालीको दुरूपयोग भएको भन्दै राजनीतिक नेतृत्वमाथि गम्भीर प्रश्न उठाएकी छिन्।

राउतले समानुपातिक प्रणालीको मूल मर्ममाथि प्रहार भएको भन्दै लेखेकी छिन्, 'समानुपातिक कसका लागि बनाइएको हो स्पष्ट छ। तर आज प्रश्न यो हो, यसलाई कब्जा कसले गर्‍यो? निर्वाचन लड्न सक्ने शक्ति, पैसा, पहुँच र पहिचान भएकाहरूलाई समानुपातिक सूचीमा बस्दा अलिकति पनि लाज लागेन?'

उनले जनआन्दोलन र रगतको त्यागलाई स्मरण गर्दै अगाडि थपेकी छिन्, 'के यहीका लागि आन्दोलन भयो? सुदूरपश्चिम, मधेस, दलित, जनजाति— उनीहरूलाई आन्दोलनको अगाडि राख्ने, तर सत्ता र निर्णयको कुर्सीमा फेरि सहरका ब्रान्डेड अनुहार मात्र? यो प्रतिनिधित्व होइन, यो त खुला धोका हो।'

नयाँ र वैकल्पिक राजनीति गर्ने दाबी गर्ने दलहरूलाई लक्षित गर्दै उनले पुरानाकै पदचाप पछ्याएको आरोप लगाएकी छिन्। उनले कलाकार, क्रिकेटर र गायकहरूलाई मैदानमा लड्ने स्रोत र साधन हुँदाहुँदै समानुपातिकमा बस्नु अवसरको ढोका बन्द भएकाहरूको अधिकार खोस्नु सरह भएको बताएकी छिन्।