जेनजी प्रतिनिधि तनुजा पाण्डेले समानुपातिक प्रणालीको प्रयोगबारे आफ्नो धारणा व्यक्त गर्दै यसलाई व्यक्तिगत वा पार्टीगत लाभका लागि अनैतिक रूपमा प्रयोग गर्नु अस्वीकार्य भएको बताएकी छन्।
मंगलबार सामाजिक सञ्जाल लेख्दै उनले भनेकी छन्, 'प्रतिनिधि सभामा फरक फरक पृष्ठभूमिका व्यक्तिहरू आउँदा लोकतन्त्र बलियो हुन्छ। विभिन्न जात, वर्ग, क्षेत्र र अनुभव भएका व्यक्तिहरूको सहभागिता विशेष महत्व राख्छ। तर निर्वाचन प्रणालीको मूल भावना र उद्देश्य उल्लंघन गर्दै व्यक्तिगत वा पार्टीगत लाभका लागि अनैतिक रूपमा प्रतिनिधि सभामा आउनु अस्वीकार्य छ।'
तनुजाले समानुपातिक प्रतिनिधित्व प्रणाली ऐतिहासिक रूपमा पछाडि पारिएका वर्ग र समुदायको संघर्ष र बलिदानबाट स्थापित भएको स्मरण गराइन्।
उनले भनेकी छन्, 'यस प्रणालीलाई नाम, पैसा वा शक्ति प्राप्तिको माध्यम बनाउन दिनु हुँदैन।'
'हिजो आरजु राणा देउवा जस्ता व्यक्तिहरू समानुपातिकबाट संसदमा आउँदा लज्जास्पद थियो र आजका केही नयाँ भनिएका पार्टीहरूले त्यही प्रवृत्ति दोहोर्याउँदै समानुपातिकको मूल भावनालाई कमजोर पार्नु दुःखद छ,' उनले लेखेकी छन्, 'यदि पुराना वा नयाँ भनिएका पार्टीहरूले समानुपातिक सूचीमा लोकप्रियता, पहुँच र चिनजानलाई प्राथमिकता दिन्छन् भने, पुरानो र नयाँ पार्टीमा कुनै फरक रहँदैन।'
समानुपातिक सूचीमा उद्यमी, प्रभावशाली र सामाजिक दृष्टिले सक्षम पात्रहरूको स्वागत भएको भन्दै उनले भनेकी छन्, 'वैकल्पिक शक्तिका साथीहरूले पनि उद्यमी, प्रभावशाली र सामाजिक दृष्टिले सक्षम नेपो किड्सहरूको स्वागत गरेको देख्दा खुसी लाग्यो!'
उनले देशका केही पात्रहरूको उदाहरण दिँदै भनिन्, 'यस देशमा मानुषी यमी भट्टराई, शृंखला खतिवडा, विदुषी राणा, अनुश्का श्रेष्ठ, सुहाङ नेम्वाङ, सृष्टि सिंह श्रेष्ठजस्ता पात्रहरू छन्, जससँग स्रोत–साधन, पुस्तान्तरीय सुविधाप्राप्ति मात्र होइन, बौद्धिकता, नेतृत्व क्षमता, सामाजिक योगदान र नैतिकता पनि उच्च स्तरको छ। यस्तो प्रतिभालाई मान्यता दिनु आवश्यक छ। अनावश्यक घृणा र इर्ष्याले कसैलाई फाइदा पुर्याउँदैन। प्रत्यक्ष निर्वाचन प्रणालीमार्फत योग्य व्यक्तिहरूलाई प्रतिनिधि सभाका लागि प्रतिस्पर्धा गर्न प्रोत्साहित गर्नुपर्छ।'
उनले शक्ति आर्जनको प्रक्रिया होर्डिङ र पहुँचमा आधारित बन्नु हुँदैन भन्दै समानुपातिकको मूल भावनालाई सधैं प्राथमिकता दिन जरूरी रहेको उल्लेख गरेकी छन्।
यी पनि पढ्नुस्ः
समानुपातिक प्रणालीलाई नातेदार भर्ती केन्द्र बनाइयो- रक्षा बम
जेनजी प्रतिनिधि भावना राउतले सोधिन्– सत्ता र निर्णयको कुर्सीमा फेरि सहरका ब्रान्डेड अनुहार मात्र?
-1746009348.jpg)
