नेपाली कांग्रेसका प्रवक्ता देवराज चालिसेले निर्वाचनको प्रचारप्रसारमा निर्वाचान आचारसंहिता विपरीत बालबालिकाको प्रयोग भएको आरोप लगाएका छन्।
नेपाली कांग्रेस केन्द्रीय प्रचारप्रसार समितिले आयोजना गरेको पत्रकार सम्मेलनमा पार्टीका प्रवक्ता देवराज चालिसेले बालबालिकालाई राजनीतिक गतिविधिमा प्रयोग गर्नु आपत्तिजनक भएको बताएका हुन्।
सानासाना बालबालिका चढेको बस प्रयोग गरी अभिभावकलाई चुनाव चिह्न र उम्मेदवारका पक्षमा प्रचार गराउने जस्ता गतिविधि जिम्मेवार राजनीतिक दलले गर्न नहुने उनको भनाइ छ।
उनले विशेष गरी चितवनमा निर्वाचनको लागि मत माग्न बालबालिकालाई प्रयोग गरेको भेटिएको जानकारी दिए।
यस्ता गतिविधिबारे रोक्न उनले निर्वाचन आयोगको ध्यानाकर्षण गराए।
चालिसेले अन्य केही दलका कार्यकर्ताले आचारसंहिता मर्यादित ढंगले पालना नगरेको गुनासो आएको बताए।
उनले फरक विचार राख्ने दल तथा उम्मेदवारविरूद्ध सामाजिक सञ्जालमार्फत अमर्यादित टिप्पणी र घृणा फैलाउने गतिविधि रोक्न पनि आग्रह गरे। यसले स्वस्थ राजनीतिक प्रतिस्पर्धाको वातावरण बिथोलिँदै जाने उनको भनाइ छ।
आफ्ना धारणा राख्दा सबै राजनीतिक दल र उम्मेदवारले मर्यादित भाषा र व्यवहार अपनाउनुपर्नेमा जोड दिँदै उनले नेपाली कांग्रेस पनि यस विषयमा सचेत रहेको बताए।
उनले भने, ‘निर्वाचन प्रचारप्रसारको क्रममा धेरै ठाउँबाट के सूचना आइरहेको छ भने निर्वाचन आचारसंहिताको उल्लंघन भइरहेको छ। अन्य पार्टीका साथीहरूले आचारसंहिता मर्यादित ढंगले पालना नगरेको रिपोर्ट आएको छ। विशेष गरेर बालबालिकाहरूलाई राजनीतिमा प्रयोग गर्ने गरिएको छ, त्यसले राम्रो सन्देश दिँदैन। उनीहरूको बालअधिकार र बालमस्तिष्कलाई राजनीतिक प्रभाव पारेर राजनीतिक उद्देश्यको लागि दुरूपयोग गर्ने कुराहरू निर्वाचनको आचारसंहिता भित्र पर्दैन। सानासाना बालबालिका चढेको बसमा जाने र आफ्नो बाबुआमालाई चुनाव चिह्न र व्यक्तिका बारेमा प्रचार गर्न लगाउने यस्ता गतिविधिहरू जिम्मेवार राजनीतिक दलहरूले गर्न नहुने गतिविधिहरू हुन्।’
उनले अगाडि भने, ‘निर्वाचन आयोगको हामी ध्यानाकर्षण गर्न चाहन्छौं। चितवनमा स्कुलका बालबालिकाहरूलाई कुनै पार्टीको चुनाव चिह्नको बारेमा आफ्नो अभिभावकहरूलाई भन्न आग्रह गरिएको देखियो। बालबालिकाले जिद्दी गरेपछि अभिभावकलाई पनि असर गर्छ नि त। मतदानको लागि बालबालिकाको मस्तिष्क प्रयोग गर्ने कुरा त राम्रो होइन नि त्यो।’
उनले निर्वाचनमा मतदान गर्नुअघि उम्मेदवार र राजनीतिक दलको पृष्ठभूमिको बारेमा जानकारी राख्न पनि आग्रह गरे।- न्युज एजेन्सी नेपाल
-1746009348.jpg)
