राष्ट्रिय स्वतन्त्र पार्टी (रास्वपा)को मधेस प्रदेशकी संस्थापक सभापति ममता शर्माले पार्टी छाडेकी छन्।
बुधबार विज्ञप्ति जारी गरी शर्माले रास्वपाको साधारण सदस्यसमेत नरहने गरी राजीनामा दिएको जानकारी गराएकी छन्।
शर्मा आगामी फागुन २१ गते हुने निर्वाचनका लागि पार्टीबाट आकांक्षी थिइन्।
रास्वपाले समानुपातिकमा पनि प्राइमरी इलेक्सन गरेको थियो। त्यसमा उनले मधेसी महिला क्लस्टरमा तेस्रो बढी मत ल्याएकी थिइन्। तर सूची आउँदा उनको नाम सोही क्लस्टरको सातौं नम्बरमा थियो।
रास्वपाले काठमाडौं महानगरका तत्कालीन मेयर बालेन शाहलाई पार्टीमा भित्र्याउनुअघि नै सूची बनाएको थियो। बालेन पार्टीमा आएपछि सूची तलमाथि भएको थियो।
प्राइमरीमा तेस्रो बढी मत पाएर सूचीमा सातौं नम्बरमा परेपछि शर्माले उम्मेदवारी फिर्ताको निवेदन दिएकी थिइन्।
समानुपातिकमा 'धोका' भएपछि पछि उनले प्रत्यक्षतर्फ पनि आकांक्षा देखाएकी थिइन्।
बारा-२ उनको स्थानीय निर्वाचन क्षेत्र हो। त्यहाँबाट आकांक्षा देखाए पनि पार्टीले चन्दनकुमार सिंहलाई रास्वपाले उम्मेदवार बनाएको छ। उनी जसपा नेपालबाट रास्वपा आएका थिए।
रास्वपा छाड्नुमा शर्माले पार्टी स्थापना हुँदा तय गरिएको विधि र प्रक्रियामा नचलेको बताएकी छन्।
'संगठनमा दिनरात खटिएका क्षेमतवान घण्टी मित्रहरूको योगदानको उचित मूल्यांकन नभएको, विधि र विधान विपरीत क्रियाकलापहरू भएको, पार्टीका सिद्धान्तहरू व्यवहारमा कार्यान्वयन नभएको र मूलत: आर्थिक अनियमितताबाट पार्टीका निर्णयहरू प्रेरित भएकोबाट मेरो आत्मसम्मान र राजनीतिक मूल्यहरूमाथि आँच आउने परिस्थिति बनेको छ। यी सबै क्रियाकलापहरूको साक्षी बसेर म अब मौन रहिरहन असमर्थ छु,' शर्माले विज्ञप्तिमा भनेकी छन्।
हामीले शर्मासँग यस विषयमा थप कुराकानी गरेका छौं। उनले विषय आफ्नो उम्मेदवारीको मात्र नभएको बताइन्।
'उम्मेदवारीको विषयमा मात्रै होइन। सम्पूर्ण देशभरका साथीहरूमाथि बदमासी भएको छ। देशैभरि १६५ वटा प्रत्यक्ष र ११० वटा समानुपातिक गरी २६५ वटा उम्मेदवार छनोट गर्दै जाँदा जुन विधि प्रक्रिया टेकेर गर्नुपर्ने थियो। त्यसको धज्जी उडाइयो,' उनले भनिन्।
उनले प्राइमरी गर्ने भनेर आकांक्षीसँग पैसा उठाएको तर त्यसअनुसार नभएको बताएकी छन्।
'समानुपातिकतर्फ प्रत्येक उम्मेदवारसँग ५० हजार, प्रत्यक्षतर्फ प्रत्येक उम्मेदवारसँग २५ हजार रूपैयाँ उठाइयो। विधि प्रक्रियामा लाने, प्राइमरी इलेक्सन गर्ने, नीतिसम्मत विधिसम्मत गर्ने भन्ने कुरा भयो, व्यवहारमा लागू हुने कुरामा शून्य गरियो,' उनले भनिन्।
यसअघि काठमाडौं क्षेत्र नम्बर ५ का उम्मेदवार आकांक्षी प्रणय राणाले प्राइमरी चुनावको नाममा पार्टीले उठाएको २५ हजार रुपैयाँ फिर्ता गर्न माग गरेका थिए।
राणाले २५ हजार फिर्ता नभए त्यो ठगी हुने बताउँदै सामाजिक सञ्जाल फेसबुकमार्फत भिडिओ सन्देश नै जारी गरेका थिए।
-1746009348.jpg)
