राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले आफ्नो रास्वपा भोट माग्न नभई काम माग्न आएको बताएका छन्।
धनगढीमा आयोजित परिवर्तन उद्घोष सभालाई सम्बोधन गर्दै वरिष्ठ नेता बालेनले रास्वपा काम माग्न जनतामाझ उपस्थित भएकाले भोट नदिए पनि काम चाहिँ दिनका लागि आग्रह गरेका हुन्।
'राष्ट्रिय स्वतन्त्र पार्टी यहाँ भोट माग्न आएको होइन काम माग्न आएको हो। काम दिनुस्। तपाईंहरूले भोट दिनुभएन भने पनि रास्वपाले सुदूरपश्चिम बनाउँछ। बरू के-के काम छ लिस्ट बनाउनुस् र दिनुस्,' उनले भने।
वरिष्ठ नेता बालेनले विपन्नले शिक्षा र स्वास्थ्योपचार पाउनुपर्ने, विकास निर्माणका कामहरू तोकिएको समयमा बन्नुपर्ने नै रास्वपाको एजेन्डा रहेको बताए।
'खल्तीमा पैसा नभएका विपन्नले शिक्षा पाउनु पर्यो यो हो हाम्रो एजेन्डा। विपन्न गरिबले स्वास्थ्योपचार पाउनुपर्यो त्यो हो हाम्रो एजेन्डा । २ वर्षमा बन्नुपर्ने सडक २० वर्षसम्म बन्दैन। त्यो डेढ वर्षमा बन्नुपर्यो त्यो हो हाम्रो एजेन्डा। रूखमा बाँधेर हुन्छ कि बाटोमा सुताएर हुन्छ कि खोरमा जाकेर हुन्छ बाटो बन्नुपर्यो,' उनले भने।
दलका नेताहरूले फरक दलका मतदाताहरू बसेका ठाउँमा बाटो नै नबनाइदिने गरेको पनि उनले बताए। रास्वपा सरकारमा आए त्यसो नहुने उनको भनाइ छ।
'बाटो बनाउनलाई यो भेगमा मेरो भोटर छैन यहाँको बाटो किन बनाउने यो भेगमा मेरो भोट छैन किन बाटो बनाउने भन्छन्। रास्वपा सरकारमा गयो भने कांग्रेस हिडँने बाटो पनि बनाउछ। एमाले हिँड्ने बाटो पनि बनाउँछ। माओवादी हिँड्ने बाटो पनि बनाउँछ। सबै नेपाली जनता हिँड्ने बाटो बनाउँछ,' वरिष्ठ नेता बालेनले भने।
उनले नेपाललाई स्वीट्जरल्याण्ड बनाउने नभई बडिमालिका, रामारोशन, खप्तड राष्ट्रिय निकुञ्जलाई संसारमा देखाउनुपर्नेमा जोड दिए।
'देशलाई स्वीट्जरल्याण्ड बनाउनुपर्छ भन्छन्। स्वीट्जरल्याण्डको बाउ बडिमालिका यहीँ छ। किन बनाउनुपर्यो। रामारोशन यहीँ छ, खप्तड राष्ट्रिय निकुञ्ज यहीँ छ। किन बनाउन पर्यो स्वीट्जरल्याण्ड। माल भाको चाल नपाको पर्यौं। भएको चिज देखाउनै सकेको छैन, सुदूरपश्चिमलाई जोड्नै सकेको छैन। जुन दिन सुदूरपश्चिमको गीतहरू काठमाडौंको चोक चोकमा बज्छ अनि बल्ल जोडिन्छ सुदूरपश्चिम काठमाडौंसँग। सुरूमा गीत बज्नुपर्यो, त्यसपछि आवाज बज्छ त्यसपछि माग पूरा हुन्छ,' उनले भने।
-1746009348.jpg)
