नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहालले देशको राष्ट्रिय स्वाधीनता र आत्मसम्मानमाथि गम्भीर चुनौती थपिएको बताएका छन्।
रोल्पामा आयोजित चुनावी सभालाई सम्बोधन गर्दै उनले विदेशी प्रतिक्रियावादी र तिनका दलालहरूका विरूद्ध नयाँ एकता र शक्तिका साथ प्रतिवाद गर्नुपर्ने आवश्यकता औंल्याए।
प्रचण्डले रोल्पालाई नेपाली जनवादी क्रान्तिको किल्ला र ‘क्रान्तिको राजधानी’ को रूपमा चित्रण गरे।
उनले भने, ‘रोल्पामा उभिएर सम्बोधन गर्दा मैले देशभरिका ७७ वटै जिल्लाका जनतालाई सम्बोधन गरेको महसुस गरेको छु। यहाँका सहिद, बेपत्ता योद्धा र क्रान्तिकारी जनताको त्यागले नै १० वर्षे जनयुद्ध सफल भएको हो।’
आफू पहिलो पटक रोल्पाबाटै निर्वाचित भएर प्रधानमन्त्री बनेको स्मरण गर्दै उनले रोल्पाका जनताप्रति आफू सधैं ऋणी रहेको बताए।
उनले भने, ‘रोल्पाका जनताले इतिहास बनाउनुभयो र तपाईंहरूकै काखमा बसेर नै हामीले नेपालको जनवादी क्रान्तिलाई आधारभूत रूपले सफल पार्न सम्भव भयो।’
वर्तमान राजनीतिक परिस्थितिलाई ‘असहज’ र ‘जटिल’ भन्दै प्रचण्डले राष्ट्र निकै ठूलो अप्ठ्यारोमा परेको उल्लेख गरे। जेन–जी युवाहरूको आन्दोलन र त्यसपछि भएका घटनाक्रमले निर्वाचनको वातावरण असहज बनाएको उनको तर्क छ।
‘नेपाली जनताले आफ्नो बारेमा निर्णय गर्ने अधिकारमाथि विदेशी शक्ति र तिनका दलालहरूले चुनौती दिने दुःसाहस गरेका छन्,’ उनले भने, ‘आज संघीय लोकतान्त्रिक गणतन्त्रको संविधान र प्राप्त उपलब्धिहरूमाथि प्रहार भइरहेको छ। महान सहिदहरुले अकल्पनीय त्याग र बलिदानबाट स्थापित गरेका मूल्य मान्यतामाथि प्रहार हुने दुःसाहस भएको छ।’
यसपटक रूकुम पूर्वबाट प्रत्यक्ष निर्वाचन लड्नुको पछाडि राष्ट्र बचाउने नयाँ अभियानको उद्देश्य रहेको उनले प्रष्ट पारे।
उनले भने, ‘म रूकुममा मात्र उम्मेदवार भएको होइन, यो रोल्पा, सल्यान र जाजरकोट सहितको केन्द्रीय आधार इलाकाको प्रतिनिधित्व हो। यहाँबाट सुरू हुने अभियानले देशभरि सुशासन, भ्रष्टाचार नियन्त्रण र आर्थिक समृद्धिको नयाँ सन्देश दिनेछ।’
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्नुपर्ने बताउँदै दाहालले सुरक्षा निकाय, राजनीतिक दल र कर्मचारीतन्त्रलाई राष्ट्र बचाउने कामलाई उच्च प्राथमिकता दिन आग्रह गरे।
उनले हालैका केही घटनाक्रमले जनतालाई चिन्तित बनाएको उल्लेख गर्दै निर्वाचन नै निकासको उत्तम विकल्प भएको दाबी गरे।
‘हामी यसपटक हतियार होइन, मतपत्रको तागत लिएर सिंहदरबार छिर्नेछौं र नयाँ समाजवादी अभियान चलाउनेछौँ,’ उनले भने।- न्युज एजेन्सी नेपाल
-1746009348.jpg)
