नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल 'प्रचण्ड' ले आफले जीवनको उत्तरार्धमा देखेको समाजवादको सपना सार्थक तुल्याउने तागत लिनका लागि आफू फेरि एक पटक रोल्पा–रूकुम जस्ता क्रान्तिका आधार इलाका आउनु परेको बताएका छन्।
शनिबार रोल्पाको लिवाङमा आयोजित चुनावी सभालाई सम्बोधन गर्दै उनले भने, ‘यो मेरो सपना जीवनको उत्तरार्धमा एकफेर फेरि त्यो तपाईंहरूको अभिमत लगेर, तपाईंहरूबाट तागत लिएर, तपाईंहरूबाट शक्ति प्रदान गरेर म देशव्यापी अभियानमा छु।’
क्रान्तिको आधार इलाका रोल्पा, रूकुम, सल्यान, जाजरकोटबाट आफूले जीवनको उत्तरार्धमा धेरै सपना देखेको कुरा पटक/पटक दोहोर्याएका प्रचण्डले समाजवद, समतामूलक समाज निर्माण गर्ने संकल्पका साथ एक पटक फेरि निर्वाचनको मैदानमा उत्रिएको बताए।
उनले यसपटक आफूहरू हतियार लिएर नभई मतदाताको मत पेटिकाको तागतमा सिंहदरबार प्रवेश गर्ने अभियानमा रहेको बताए।
‘यो पटक हामीले हतियार लिएर मैदानमा उत्रिएका छैनौं। हामीले मतपत्र लिएर तपाईंको मतपत्रको तागतमा सिंहदरबार गएर फेरि एकचोटि नयाँ समाजवादी अभियान चलाउने संकल्प लिएर तपाईंहरूको साथमा आएका छौं,’ प्रचण्डले भने, ‘पक्कै पनि तपाईंहरूले रेकर्ड बनाउनु हुनेछ। हाम्रा उम्मेदवारलाई अत्यधिक बहुमतले विजयी गराउनु हुनेछ।’
प्रचण्डले रोल्पाका उम्मेदवार वर्षमान पुनलाई रेकर्ड बनाउने गरी मत दिएर पठाउन आग्रह गर्दै त्यसपछि वर्षमानको जिम्मा आफ्नो हुने रोल्पालीलाई आश्वासन दिए।
‘रेकर्ड बन्ने गरी वर्षमानलाई अत्यधिक बहुमत दिएर यहाँबाट पठाउनुहोस्,’ प्रचण्डले भने, ‘वर्षमानलाई के गर्नु पर्छ मेरो जिम्मा छोडिदिए हुन्छ।’
जेनजी आन्दोलन पछिको जटिल परिस्थितिबाट मुलुकलाई पार लगाउन चुनावको विकल्प नरहेको हुँदा निर्वाचन अपरिहार्य रहेको प्रचण्डले बताएका थिए।
नेकपा यही नयाँ तागतका साथ प्रतिक्रियावादीहरूका विरूद्ध एउटा राम्रै अभियान चलाउने संकल्पका लिएर उभिएको उनले बताए।
-1746009348.jpg)
