इरानले साउदी अरबमा पनि हवाई हमला गरेको छ।
साउदीको राजधानी रियाध र अन्य पूर्वी क्षेत्रहरूमा इरानले हमला गरेको अन्तर्राष्ट्रिय समाचार संस्था रोयटर्सले लेखेको छ।
साउदी अरबको विदेश मन्त्रालयले इरानबाट हमला भएको भनेको छ। मन्त्रालयले यसबारेमा थप विवरण सार्वजनिक नगरेको पनि रोयटर्सले जनाएको छ।
साउदीले इरानी हमलाको निन्दा गरेको छ।
संयुक्त अरब इमिरेट्स (युएई) को राजधानी आबुधाबीमा पनि विस्फोटको ठूलो आवाज सुनिएको भनेर रोयटर्सले प्रत्यक्षदर्शीलाई उद्धृत गर्दै लेखेको छ।
दुबईमा तीन वटा ठुल्ठूला धमाकाका आवाज सुनिएको पनि रोयटर्सले लेखेको छ।
दुबईमा तीन वटै प्रहार त्यहाँको प्रतिरक्षा प्रणालीले निस्तेज पारेको बताइएको छ।
युएईमै दिउँसो भएको हमलामा १ जनाको मृत्यु भएको थियो।
इरानबाट प्रहार गरिएको मिसाइल युएईले आकाशमै नष्ट गरे पनि त्यसको टुक्रा एउटा घरमा खस्दा एक जनाको मृत्यु भएको भनिएको छ।
युएईको रक्षा मन्त्रालयले मृत्यु हुने एसियाली नागरिक रहेको भनेको छ। तर मृतकबार पूरा विवरण दिइएको छैन।
कतारमा रहेको अल उदैद हवाई अड्डा, कुवेतको अल-सालेम हवाई अड्डा, युएईको अल धाफ्रा एयर बेस, बहराइनस्थित नौसेना अड्डालाई निशाना बनाएको छ।
यसबाहेक मध्यपूर्वका बहराइनमा रहेको अमेरिकी नौसेनाको अड्डा र उत्तरी इराकमा रहेको अमेरिकी आधार शिविरलाई पनि लक्ष्य बनाएको भनेर सिएनएनले लेखेको छ।
कतारले तीन पटकसम्म इरानबाट आएको मिसाइल सफलतापूर्वक नष्ट गरिएको भनेको छ।
इरानले अमेरिकाबाट हमला भए मध्यपूर्वमा रहेको उसका सैन्य अड्डाहरूलाई लक्ष्य गरेर आक्रमण गर्ने चेतावनी यसअघि नै दिएको थियो
इरानका रक्षामन्त्री र आइआरजिसी कमान्डर मारिएको दाबी
अमेरिका र इसराइलले इरानका रक्षामन्त्री र इस्लामिक रिभोलुसनरी गार्ड कोर (आइआरजिसी)का कमान्डर मारिएको दाबी गरेको छ।
शनिबार बिहान तेहरानमा अमेरिका र इसराइलले गरेको हवाई हमलामा इरानी रक्षामन्त्री अमिर नासिरजादेह र आइआरजिसी कमान्डर जनरल मोहम्मद पाकपुर मारिएको तीन उच्च स्रोतलाई उद्धृत गरी अन्तर्राष्ट्रिय समाचार संस्था रोयटर्सले लेखेको छ।
इसराइली अधिकारीहरूले पनि आइआरजिसी कमान्डर पाकपुर, रक्षामन्त्री नासिरजादेह तथा इरानका गुप्तचर प्रमुख हमलामा मारिएको सम्भावना रहेको बताएका थिए।
रोयटर्सले तीन उच्च स्रोतलाई उद्धृत गरेर उनीहरू मारिएको लेखे पनि इरानी पक्षबाट पुष्टि नभएको बताएको छ।
रिपोर्टअनुसार शुक्रबार बिहान गरिएका आक्रमणहरू इरानका शीर्ष राजनीतिक तथा सैन्य नेतृत्वलाई निशाना बनाइएको थियो।
लक्षित व्यक्तिहरूमा इरानी सर्वोच्च नेता आयातोल्लाह अली खामेनी र राष्ट्रपति मसउद पेजेश्कयान पनि रहेको बताइएको छ। उनीहरूको अवस्था भने स्पष्ट हुन सकेको छैन।
शनिबार बिहान इरानले राष्ट्रपति सुरक्षित रहेको भनेको थियो।
आक्रमणको विस्तृत विवरण र क्षतिको यकिन अवस्था अझै सार्वजनिक भएको छैन।
कतारी मिडिया अलजजिराले इरानको हर्मोजगन प्रान्तको मिनाबमा एक विद्यालयमा ५३ जनाको मृत्यु भएको उल्लेख गरेको छ।
इरानी विदेशमन्त्री अब्बास अराक्चीले विद्यालयमा भएको आक्रमणपछिको तस्बिर साझा गर्दै अमेरिका र इसराइलले इरानीमाथि अपराध गरेको बताएका छन्।
-1746009348.jpg)
