राष्ट्रिय स्वतन्त्र पार्टी (रास्वपा)ले मध्यपूर्वी क्षेत्रमा भइरहेको तनावबीच आवश्यक परेमा नेपाली नागरिकको उद्धार गर्न सरकारलाई अनुरोध गरेको छ।
शनिबार अन्तर्राष्ट्रिय सम्बन्ध विभाग प्रमुख शिशिर खनालले विज्ञप्ति जारी गर्दै आवश्यक परेमा नेपालीको उद्धार तथा सुरक्षित आवागमनको तयारी गर्न अनुरोध गरेका हुन्।
'रास्वपा, सम्बन्धित देशस्थित नेपाली दूतावासहरुलाई उच्च सतर्कतामा राख्दै आवश्यक परे तत्काल उद्धार तथा सुरक्षित आवागमनको तयारी गर्न, आपतकालीन सम्पर्क संयन्त्र प्रभावकारी बनाउन र नेपालीको अवस्थाबारे नियमित तथ्यगत जानकारी सार्वजनिक गर्न नेपाल सरकारलाई आग्रह गर्दछ,' रास्वपाले भनेको छ।
अमेरिका र इसराइलले हमला गरेपछि इरानले खाडी र मध्यपूर्वका विभिन्न देशमा रहेका अमेरिकी सैन्य अड्डाहरूमा लक्ष्य गरेर जबाफी हमला गरेको छ।
शनिबार बिहान इसराइलबाट इरानको राजधानी तेहरान लगायतका ठाउँहरूमा हमला भएको थियो। हमलाको केही पछि मात्रै अमेरिकी राष्ट्रपति डोनाल्ड ट्रम्पले इरानमा अमेरिकाले हमला गरेको बताएका थिए।
जबाफमा इरानले इसराइलमा दर्जनौं ब्यालिस्टिक मिसाइल प्रहार गरेको थियो।
यसरी तनावपूर्व अवस्था सिर्जना भएपछि हवाइ उडानहरू रद्द समेत भएका छन्।
-1746009348.jpg)
