अमेरिका र इसराइलले शनिबार बिहान इरानका सैन्य तथा सरकारी संरचनामाथि आक्रमण सुरु गरेपछि इरानले प्रत्याक्रमण गर्दै सात देशलाई निशाना बनाएको जनाएको छ।
इरानले पर्सियन खाडी क्षेत्रका विभिन्न देशमा रहेका अमेरिकी सैन्य अड्डाहरूमा मिसाइल र ड्रोन आक्रमण गरेको दाबी गरेको हो।
इरानको इस्लामिक रिभोलुसनरी गार्ड कोर (आइआरजिसी) का अनुसार इसराइलसँगै कतारको अल–उदेइद एयर बेस, कुवेतको अल–सालेम एयर बेस, संयुक्त अरब इमिरेट्स (यूएई) को अल–धाफ्रा एयर बेस र बहराइनस्थित अमेरिकी नौसैनिक अड्डालाई निशाना बनाइएको छ।
साउदी अरबमा पनि इरानले हमला गरेको छ।
त्यस्तै जोर्डनको मुवाफ्फाक अल–सल्ती एयर बेस र उत्तरी इराकमा रहेको अमेरिकी अड्डा पनि आक्रमणको निशानामा परेको इरानी सरकारी सञ्चारमाध्यमले जनाएको छ।
सँगै इरानले इसराइलतर्फ पनि दर्जनौं ब्यालिस्टिक मिसाइल प्रहार गरेको जनाएको छ।
इसराइलले दिउँसोसम्म इरानबाट करिब ४० वटा ब्यालिस्टिक मिसाइल प्रहार भएको पुष्टि गरेको छ। त्यसमा केही सामान्य घाइते भएको पनि बताएको छ।
कतारको रक्षा मन्त्रालयले इरानबाट प्रहार गरिएका तीन चरणका सबै मिसाइल आफ्नो प्रतिरक्षा प्रणालीले निस्तेज पारेको जनाएको छ।
यूएईको दुबई र आबुधाबीमा अपराह्नको समयमा ठुल्ठूला विस्फोटका आवाज सुनिएको थियो। त्यहाँको हवाई प्रतिरक्षा प्रणालीले केही मिसाइल निस्तेज गरे पनि एक मिसाइलको भग्नावशेष अबुधाबीमा खस्दा एक एसियाली नागरिकको मृत्यु भएको यूएईको सरकारी समाचार एजेन्सीले जनाएको छ।
दुबईको पर्यटकीय क्षेत्र पाम जुमेराहमा आगलागी हुँदा चार जना घाइते भएका छन्।
आगलागी प्रत्यक्ष प्रहारबाट भएको हो वा खसेको भग्नावशेषका कारण भएको हो भन्ने स्पष्ट छैन।
बहराइनमा एक मिसाइल अमेरिकी नौसैनिक अड्डामा लागेको जनाइएको छ। शनिबार नै इरानी ड्रोनले त्यहाँको एक सैन्य संरचनामा प्रहार गरेको थियो।
साउदी अरबको राजधानी रियाद र पूर्वी प्रान्त पनि इरानी मिसाइलको निशानामा परेको साउदी प्रेस एजेन्सीले जनाएको छ। साउदीले उक्त आक्रमणलाई कायरतापूर्ण भनेको छ। तर क्षतिको विवरण खुलाएको छैन।
जोर्डनले आफ्ना हवाई प्रतिरक्षा प्रणालीले दुई वटा ब्यालिस्टिक मिसाइल खसालेको जनाएको छ। यद्यपि राजधानीमा धेरै घरहरूमा क्षति भएको विवरण प्राप्त भएको भनेर अन्तर्राष्ट्रिय समाचार संस्था रोयटर्सले लेखेको छ।
कुवेतले पनि आफ्नो एयर बेसमाथि प्रहार गरिएका मिसाइल निस्तेज पारिएको जनाएको छ।
तर पछि इरानी ड्रोनले कुवेतको अन्तर्राष्ट्रिय विमानस्थलमा प्रहार गर्दा केही व्यक्ति घाइते भएको विवरण सार्वजनिक भएको छ।
कुवेतको एक अस्पतालमा १२ जना घाइतेहरूलाई ल्याइएको भनेर रोयटर्सले लेखेको छ।
हमलामा इरानमा पनि दर्जनौंको मृत्यु भएको आंशका गरिएको छ।
कतारी मिडिया अल जजिराले इरानको एउटा विद्यालयमा कम्तिमा ५४ जनाको मृत्यु भएको उल्लेख गरेको छ। शनिबार बेलुकी नै इरानको दक्षिणी सहर लामेर्डमा १५ जनाको मृत्यु भएको भनेको छ।
इरानी विदेशमन्त्री अब्बास अराघ्चीले उच्च अधिकारीहरूको विषयमा बोले पनि अन्य क्षतिबारे बोलेका छैनन्।
उनले सर्वोच्च नेता आयातोल्लाह अलि खामेनी जीवितै र सुरक्षित रहेको भनेका छन्। त्यस्तै राष्ट्रपति मशुद पेजिस्किएन पनि सुरक्षित रहेको उनले बताएका छन्। यद्यपि केही कमाण्डरहरू भने मारिएको दाबी गरिएको छ।
इसराइली अनलाइन टाइम्स अफ इसराइलले इरानी रक्षामन्त्री अमिर नासिरजादेह र आइआरजिसी कमान्डर जनरल मोहम्मद पाकपुर मारिएको दाबी गरेको छ।
इसराइलले इरानका विदेशमन्त्री खामेनी र राष्ट्रपति मशुद पेजिस्कियनलाई लक्ष्य गरेर हमला गरिएको भनेर शनिबार दिउँसै बताएको थियो।
अमेरिकी राष्ट्रपति डोनाल्ड ट्रम्पले पनि आफ्नो सम्बोधनका क्रममा इरानी जनतालाई सत्ता आफ्नो नियन्त्रणमा लिन तयार रहनू भनेर आग्रह गरेका थिए।
इरानले राष्ट्रपति पेजिस्कियन पनि सुरक्षित नै रहेको भनेर शनिबार दिउँसै बताएको थियो।
उनले खाडीका विभिन्न मुलुकहरूसँग पनि कुराकानी भएको र उनीहरूमाथि आक्रमण गर्ने इरानको कुनै उद्धेश्य नभएको, केबल आत्मरक्षाका लागि त्यहाँका अमेरिकी सैन्य अड्डाहरूमा हमला गरिएको भनेर जानकारी गराइएको बताएका छन्।
हमलापछि अमेरिकासँग कुनै संवाद नभएको बताएका छन्।
‘उनीहरूसँग हाम्रो संवाद भएको छैन। अमेरिकाले चाह्यो भने कसरी कुरा हुन्छ भन्ने उनीहरूले जान्दछन्,’ अराघ्चीले भने।
-1746009348.jpg)
