नेपाली कांग्रेसका सभापति गगन थापाले सार्वजनिक पदमा रहेकाहरूको सम्पत्ति छानबिन गर्न नयाँ सरकारले आयोग गठन गर्नुपर्ने बताएका छन्।
रास्वपाले झन्डै दुई तिहाइ सिट जितेको छ र एकल सरकार बनाउँदैछ। सरकार बन्नुअघि सभापति थापाले सम्पत्ति छानबिन आयोग गठनको माग गरेका हुन्।
आज सानेपामा बसेको केन्द्रीय कार्यसमिति बैठकमा बोल्दै सभापति थापाले भने, ‘२०४८ देखि २०८२ सालसम्म जति सरकार बनेका छन् र सार्वजनिक जीवनमा, सार्वजनिक पदमा बसेका सबैको सम्पत्ति छानबिन गर्न आयोग गठन गर्नुपर्छ।’
उनले गलत ढंगबाट कसैले सम्पत्ति आर्जन गरेको देखिएमा जफत गर्नुपर्ने पनि बताए।
‘सार्वजनिक पदमा बसेकाहरूको सम्पत्ति छानबिन गर्ने, गलत ढंगले सम्पत्ति आर्जन गरेको पाइएमा जफत गर्नुपर्छ,’ उनले भने, ‘रास्वपाले सम्पत्ति छानबिनसम्बन्धी आयोग बनाउने भनेको थियो। नयाँ बन्ने सरकारले यो आयोग बनाउनुपर्छ।’
यस्तो आयोग सरकारले बनाएका खण्डमा कांग्रेसको सहयोग रहने पनि उनको भनाइ छ।
-1774340005.jpg)
