भदौ २३ र २४ को जेनजी आन्दोलनमा तत्कालीन गृहमन्त्री रमेश लेखकले आफूले गोली चलाउन आदेश नदिएको बयान दिएका छन्।
पूर्वन्यायाधीश गौरीबहादुर कार्की संयोजकत्व जाँचबुझ आयोगमा दिएको बयानमा तत्कालीन गृहमन्त्री लेखकले आफूले गोली चलाउन आदेश नदिएको बताएका हुन्।
'संसद भवनलाई कुनै पनि हालतमा सुरक्षित राख्नुपर्छ भन्ने धारणा थियो। तर अन्तिम बल प्रयोग अर्थात् गोली प्रहार गर्न कुनै पनि आदेश दिएको थिइनँ,' लेखकले आयोगलाई दिएको बयानमा भनेका छन्।
स्थलगत परिस्थितिका आधारमा त्यहाँ खटिएका अधिकारीले बल प्रयोगको निर्णय गर्ने विषय भएको उनले बताएका छन्।
घटनाक्रम सुरू हुनुअघि नै सामाजिक सञ्जाल र अन्य माध्यमबाट असन्तुष्टि तथा आक्रोश बढिरहेको जानकारी सुरक्षा निकायमार्फत प्राप्त भएको उनको भनाइ छ।
त्यसै आधारमा गृह मन्त्रालयले नेपाल प्रहरी, सशस्त्र प्रहरी बल र राष्ट्रिय अनुसन्धान विभागसँग निरन्तर समन्वय गर्दै स्थिति अनुगमन गरिरहेको थियो। तर आफूले प्रत्यक्ष आदेश नदिएको उनले बताएका छन्।
नीतिगत निर्देशन, समन्वय र राजनीतिक तहबाट आवश्यक सहजीकरण गर्ने आफ्नो जिम्मेवारी रहेको उनको बयान छ।
बानेश्वरतर्फ प्रदर्शन उग्र र हिंसात्मक हुँदै गएको जानकारी पाउनासाथ आफूले प्रधानमन्त्री, रक्षामन्त्री र नेपाली सेनाका प्रधानसेनापतिलाई जानकारी गराएको समेत उनले बयानमा बताएका छन्।
-1766990596.jpg)
-1746009348.jpg)
