नेकपा एमालेका अध्यक्ष केपी शर्मा ओलीले राष्ट्रिय स्वतन्त्र पार्टी (रास्वपा) ले ल्याएको दुई तिहाइ नजिक मत जादुगरले हात हल्लाउँदा परेवा निकालेजस्तो भएको टिप्पणी गरेका छन्।
बिहीबार प्रतिनिधि सभा, राष्ट्रिय सभाका नवनिर्वाचित सांसदहरूलाई सम्बोधन गर्दै ओलीले निर्वाचन परिणामबाट निराश नहुन पनि आग्रह गरे।
‘संवैधिानक, कानुनी र संसदीय प्रक्रियाबाट सरकार गएको होइन। हुलहुज्जतबाट सरकार गएको हो। यसमा हामी द्विविधामा हुनुहुँदैन। तर जननिर्वाचित संसद भंग गरेर तत्काल अर्को निर्वाचन, हुलहुज्जतका साथ संसद विघटन किन गर्नुपर्यो, भन्दा एउटा जादुमय निर्वाचनको मञ्चन गरेर, लगभग दुई तिहाइको स्थितिमा एउटा नतिजा ल्यायौं भनेर.. एउटा नतिजा...,’ उनले भने, ‘जादुगरले यसो हात हल्लाउँदाखेरी यसो परेवा निकालेजस्तै, यो एउटा परेवा निकालेको मात्रै हो।’
राजनीतिको उतारचढावसँग हरेश खान नहुने उनको भनाइ थियो।
‘हामीले राजनीतिको उतारचढावसँग हरेश खानुहुँदैन। राजनीतिमा उतारचढाव भइरहन्छ। २०१५ सालमा नेपाली कांग्रेस झण्डै दुई तिहाइको थियो। २०७४–७५ मा नेकपा अर्थात् हामी झण्डै दुई तिहाइको थियो। अहिले रास्वपा दुई तिहाइमा छ,’ उनले भने।
इतिहासमा पहिलोपटक रास्वपाले दुई तिहाइ मत नल्याएको पनि उनले बताए।
२०१५ सालमा दुई तिहाइ नै नेपाली कांग्रेसले ल्याएको पनि उनले स्मरण गराए।
‘योभन्दा बेटर पोजिसन २०१५ सालमा नेपाली कांग्रेसको थियो। २०१७ सालको फौजी काण्डबाट त्यो समाप्त भयो। फौजी काण्ड निन्दनीय छ। तर भएको थियो। महेन्द्रले गरेको फौजी काण्ड, सत्ता कब्जा, कू थियो। निर्वाचित प्रधानमन्त्रीलाई जबरजस्ती हटाइएको थियो। अहिले पनि संवैधानिक प्रक्रियाबाट निर्वाचित प्रधानमन्त्रीलाई हटाएको होइन। सरकार संवैधिानक, कानुनी र संसदीय प्रक्रियाबाट गएको होइन। हुलहुज्जतबाट सरकार गएको हो। यसमा हामी द्विविधा हुनुहुँदैन,’ उनले भने।
योभन्दा अगाडि रास्वपा २० सिटमा रहेको बताउँदै उपनिर्वाचनबाट २१ सिटको बनेको उनले बताए।
अहिले प्रतिनिधि सभामा एमाले त्योभन्दा त बढी नै रहेको भन्दै निराश नहुन आग्रह गरे।
‘फरक कति हो भने हामी अलिकति खस्किएर यहाँ आइपुगेका हौं। उचाहिँ खस्किएर त्यहाँ पुगेको थिएन। तर सीमान्त उपयोगिता ह्रास नियम भन्ने हुन्छ। कुनै चिज उत्कर्षमा पुगेपछि ह्रास हुने, घट्ने दिशा प्रारम्भ हुन्छ। हामी देश, जनताविरूद्ध, सुशासन विरूद्धको कुनै कामले, भ्रष्टाचारजन्य कुनै क्रियाकालपा या कामले अथवा विकास गरेर कुनै कामले असफल भएको हुनाले सरकारबाट हटेका होइनौं। घृणाको राजनीति र चौतर्फी संयुक्त हमला भएर सरकारबाट हटेका कारणले निराश हुनुपर्दैन। हामी फेरि पनि जनतालाई साथ लिएर अगाडि बढ्न सक्छौं,’ उनले भने।
-1746009348.jpg)
