नेकपा (एमाले)का अध्यक्ष केपी शर्मा ओली पक्राउ परेका छन्।
पूर्व प्रधानमन्त्री रहेका ओलीलाई ज्यान सम्बन्धी कसुरमा अनुसन्धान गर्न जरूरी पक्राउ पुर्जी दिएर प्रहरीले उनकै निवासबाट नियन्त्रणमा लिएको छ।
अहिले उनलाई उनलाई जिल्ला प्रहरी परिसर काठमाडौंमा ल्याइँदै गरेको एसएसपी रमेश थापाले जानकारी दिए।
ओलीलाई जरूरी पक्राउ पुर्जी दिएर पक्राउ गरेको एसएसपी थापाले पुष्टि गरे।
ओलीको तर्फका वकिल वरिष्ठ अधिवक्ता टिकाराम भट्टराईका अनुसार ज्यान सम्बन्धी कसुरमा अनुसन्धान गर्न भनी उल्लेख रहेको जरूरी पक्राउ दिइएको थियो।
‘पुर्जीमा ज्यान सम्बन्धी कसुरमा अनुसन्धान गर्न नियन्त्रणमा लिइएको भन्ने छ,’ उनले भने।
आज शनिबार परेकाले प्रहरीले ओलीलाई भोलि मात्रै म्याद थपका लागि अदालत उपस्थित गराउनेछ।
प्रहरीले पूर्वन्यायाधीश गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्न ओलीलाई नियन्त्रणमा लिएको हो।
प्रधानमन्त्री बालेन शाहको पहिलो क्याबिनेटले उक्त प्रतिवेदन कार्यान्वयन गर्ने निर्णय गरेको शुक्रबार गरेको थियो।
ओलीमाथि मुलुकी अपराध संहिता २०७४को दफा १८१ लापरवाहीपूर्ण काम गरी ज्यान मार्न नहुने कसुर, १८२ हेलचक्राइ गरी ज्यान मार्न नहुने कसुरमा अनुसन्धान हुने भएको हो।
प्रतिवेदनले पनि ओलीलाई दफा १८१ र १८२ अनुसार अनुसन्धान गर्न सिफारिस गरेको हो।
ओलीसँगै तत्कालीन गृहमन्त्री रमेश लेखक र तत्कालीन प्रहरी महानिरीक्षक चन्द्रकुबेर खापुङ विरूद्ध पनि सोही कसुर अनुसार अनुसन्धान र अभियोजनका लागि सिफारिस भएको थियो।
-1746009348.jpg)
