राष्ट्रिय स्वतन्त्र पार्टी (रास्वपा) का सभापति रवि लामिछानेविरूद्ध कास्की जिल्ला अदालतमा विचाराधीन सम्पत्ति शुद्धीकरण मुद्दाको जानकारी संसदमा पठाउने कि नपठाउनेबारे सरकारी वकिलको कार्यालय अलमलमा परेको छ।
सभापति लामिछानेविरूद्ध अदालतमा विचाराधीन मुद्दाबारे संसदलाई जानकारी दिने कि नदिने भनेर आफू अहिलेसम्म कुनै निर्णयमा नपुगेको जिल्ला न्यायाधिवक्ता कमला काफ्लेले जानकारी दिइन्।
यस विषयमा संसद सचिवालयले अहिलेसम्म कुनै सोधपुछ नगरेको र महान्यायाधिवक्ताको कार्यालयले पनि कुनै निर्देशन नदिएको उनको भनाइ छ।
'उहाँ (रवि लामिछाने) का विरूद्ध अदालतमा सम्पत्ति शुद्धीकरण मुद्दा विचाराधीन छ। मुद्दा फिर्ता लिन पेस गरेको संशोधन पत्र पनि विचाराधीन छ,' उनले भनिन्, 'संसदलाई मुद्दा चलेको जानकारी दिने कि नदिने भनेर केही भएको छैन। संसद सचिवालय र महान्यायाधिवक्ताको कार्यालयले पनि चासो राखेका छैनन्।'
सम्पत्ति शुद्धीकरण निवारण ऐन २०६४ को दफा २२ मा सरकारी वकिलले मुद्दा चलाउने निर्णय गरेपछि नेपाल राजपत्रमा सूचना प्रकाशित गरी अदालतमा मुद्दा दायर गर्नुपर्ने उल्लेख छ।
सोही ऐनको दफा २७ मा सम्पत्ति शुद्धीकरण मुद्दा चलेका संस्थाका पदाधिकारी, कर्मचारी र राष्ट्रसेवक थुनामा रहेको अवधिभर र मुद्दा दायर भएपछि सो मुद्दाको किनारा नभएसम्म त्यस्ता पदाधिकारी, कर्मचारी वा राष्ट्रसेवक स्वतः निलम्बन भएको मानिने उल्लेख छ।
सोही ऐनको प्रावधानमा टेकेर जिल्ला सरकारी वकिलको कार्यालय कास्कीले यसअघि लामिछानेविरूद्ध सम्पत्ति शुद्धीकरण मुद्दा चलेको जानकारी संसद सचिवालयमा पेस गरेको थियो।
सोही जानकारीका आधारमा संसद सचिवालयले सूचना प्रकाशित गरी लामिछानेको सांसद पद निलम्बन गरेको थियो। उक्त प्रतिनिधि सभा विघटन भएपश्चात लामिछाने फेरि चितवनबाट प्रतिनिधि सभा सदस्य निर्वाचित भएका छन्।
उनी सभापति रहेको रास्वपाले झण्डै दुई तिहाइ बहुमत ल्याएर सरकार गठनसमेत गरिसकेको छ। जिल्ला न्यायाधिवक्ता काफ्लेले यसअघि नै संसद सचिवालयलाई पठाएको पत्रकै आधारमा संसद सचिवालयले यसबारे निर्णय गर्ने हो कि, जिल्ला सरकारी वकिलको कार्यालयले फेरी पत्र लेख्नुपर्ने हो भन्नेबारे पनि यकिन नभएको बताइन्।
'संसद सचिवालयमा हामीले यसअघि पठाएको पत्र दर्ता छ, त्यसैका आधारमा थप केही सोधपुछ गर्न सक्नुहुन्छ,' उनले भनिन्, 'फेरि सोही प्रकृतिको पत्र स्वतः स्फुर्त पठाउनुपर्ने हो कि होइन भनेर मैले सोचेकी छैन।'
लामिछानेविरूद्ध पोखराको सुर्यदर्शन बचत तथा ऋण सहकारी संस्थ ठगी, संगठित अपराध र सम्पत्ति शुद्धीकरण मुद्दा २०८१ पुस ७ गते जिल्ला अदालतमा दर्ता भएको थियो। लामिछानेविरूद्ध सरकारी वकिलको कार्यालयले अदालतमा पेस गरेको अभियोग पत्रमा २७ करोड ८९ लाख ४४ हजार रुपैया सम्पत्ति शुद्धीकरण गरेको अभियोग छ।
सुर्यदर्शन सहकारीबाट लामिछाने संस्थापक सेयर सदस्य एवंल प्रबन्ध निर्देशक रहेको गोर्खा मिडियाद्वारा संचालित ग्यालेक्सी टेलिभिजनमा ६७ करोड ८७ लाख रुपैयाँ लगेको र उक्र रकममध्ये २६ करोड रुपैयाँ लामिछानेले रकमान्तर गरेको अभियोग पत्रमा उल्लेख छ।
'प्रतिवादी रवि लामिछाने सेयर होल्डर तथा प्रबन्ध निर्देशक रहेको गोर्खा मिडिया नेटवर्क प्रालिमा सूर्यदर्शन बचत तथा ऋण सहकारी संस्था लिमिटेड समेतबाट बचतकर्ताको अपचलन भएको रकम तथा कसुरबाट आर्जित ६७ करोड ८७ लाख ७० हजार २२० निक्षेप भएको,' अभियोगपत्रमा भनिएको छ, 'सोमध्ये प्रतिवादी रवि लामिछाने सेयरहोल्डरका रूपमा रहेको अवधिमा २६ करोड १४ लाख ४४ हजार ७०५ रकमान्तर भई आएको।'
'विभिन्न सहकारीको अपचलन गरी प्राप्त हुन आएको सम्पत्तिको गैरकानुनी स्रोत लुकाउने, छल्ने अधिकार र स्वामित्व परिवर्तन गर्ने, कसुरबाट प्राप्त सम्पत्तिको सही प्रकृति, स्वरूप र स्रोत छल्ने एवं बदल्ने र सम्पत्तिको गैरकानुनी स्रोत र सोबाट प्राप्त सम्पत्तिको बीचमा दूरी कायम गर्ने समेतका कार्य गरी उक्त कम्पनीका बैंक खाताहरूमा गरी गराई प्राप्त हुन आएको रकम गोर्खा मिडिया नेटवर्क प्रालिमार्फत प्रयोग तथा रकमान्तर समेत गरी सम्पत्ति शुद्धीकरण कसुर गरेको सप्रमाण पुष्टि हुन आयो,' रविविरूद्धको अभियोगपत्रमा उल्लेख छ।
गोर्खा मिडिया नेटवर्कको निक्षेप ९३ करोड ३५ लाख थियो, जसमध्ये ६७ करोड ८७ लाख रूपैयाँ सूर्यदर्शन सहकारीबाट गएको अभियोगपत्रमा उल्लेख छ। त्यही रकममा २६ करोड भने रविले हस्ताक्षर गरी अरू कम्पनी तथा व्यक्तिहरूलाई पठाएको अभियोगपत्रमा उल्लेख छ।
अभियोगपत्र अनुसार गोर्खा मिडियाबाट भुक्तानी भएका चेकहरूको विवरण विश्लेषण गर्दा १२३७ वटा चेकबाट ५९ करोड ४९ लाख ४४ हजार ९५५ रूपैयाँ भुक्तानी भएको थियो। त्यसमध्ये ८१४ चेकबाट ४८ करोड ५८ लाख २२ हजार २४६ रूपैयाँ बराबरको भुक्तानी रवि लामिछानेको एकल हस्ताक्षरित चेकबाट भएको थियो। रवि र जिबीले संयुक्त रूपमा हस्ताक्षर गरेका ६ वटा चेकबाट ६० लाख १९ हजार रूपैयाँ बराबरको भुक्तानी भएको थियो।
रकम शुद्धीकरणका लागि गोर्खा मिडियामा आएका रकमलाई मिडियासँग असम्बन्धित कम्पनी नेचर हर्ब, नेचर नेस्ट लगायतमा रकमान्तर तथा ुलेयरिङु गरेको अभियोगमा दाबी छ।
त्यस्तै सूर्यदर्शन सहकारीबाट रविले २०७७ असारदेखि एक वर्षका लागि लिएको १ करोड ऋणलाई पनि सम्पत्ति शुद्धीकरण गरिएको उसको दाबी छ। त्यो ऋण तिर्न रविले गोर्खा मिडियाको आइएमई खाताको चेकमा सञ्चालकको हैसियतले आफैले हस्ताक्षर गरेर मासिक रूपमा कहिले १ लाख त कहिले २ लाख रूपैयाँ पठाएको प्रमाण उल्लेख गरिएको छ।
रवि र जिबीले एकअर्कालाई बैंक खातामा पठाएको ७५ लाखलाई पनि सम्पत्ति शुद्धीकरण गर्ने उद्देश्य मानिएको छ। सूर्यदर्शन बचत तथा ऋण सहकारीका नाममा मेगा बैंकको खाताबाट जिबी राईको स्ट्यान्डर्ड चार्टर्ड बैंकमा दुई करोड रूपैयाँ जम्मा भएको थियो।
यही दुई करोडमध्ये ७५ लाख रूपैयाँ जिबी २०७७ माघ ८ गते रविको ग्लोबल आइएमई बैंकको खातामा पठाएका थिए। त्यसपछि माघ ९ गते रविले उक्त रकम गोर्खा मिडियाको ग्लोबल आइएमई खातामा पठाएको देखिन्छ। यसरी रविले ७५ लाख जिबीबाट र सूर्यदर्शनबाट सोझै व्यक्तिगत रूपमा लिएको १ करोड ऋण र गोर्खा मिडियामा ल्याएको २६ करोड १४ लाख गरी २७ करोड ८९ लाखको सम्पत्ति शुद्धीकरण गरेको अभियोगपत्रमा उल्लेख छ। प्रहरीले अनुसन्धान गर्न जिबी ग्रुप अफ कम्पनीबाट बरामद भएका दस्तावेजलाई केलाएर यी तथ्य भेटाएको अभियोगपत्रमा उल्लेख छ।
लामिछानेले बयानमा भने आफू सेयरधनी रहे पनि कम्पनीमा आएका रकमबारे आफूलाई थाहा नभएको बताएका थिए। आफ्नो नाममा भएको १ करोड रकमबारे भने संसदीय समितिमा बयान दिन जाँदा आधिकारिक रूपमा थाहा पाएको रविले सरकारी वकिलसँगको बयानमा बताएका थिए।
'सहकारीबाट रकम लिने कार्यमा म कुनै पनि किसिमबाट संलग्न नरहेको र सहकारीको रकम मैले उपभोगसमेत नगरेको हुँदा सहकारीको रकम फिर्ता गर्ने जिम्मेवारी मेरो रहँदैन। सहकारी संस्थाबाट मैले ऋण लिएको भए ऋण तथा ब्याज तिर्न पत्र तथा ताकेता आउनुपर्ने थियो। गैरकानुनी ढंगबाट ऋण लिइएको मलाई जानकारी छैन,' उनले प्रहरीसँगको बयानमा भनेका छन्।
-1746009348.jpg)
