सम्पत्ति शुद्धीकरण अनुसन्धान क्रममा व्यवसायी दिपक भट्टको पासपोर्ट रोक्का गरिएको छ।
सम्पत्ति शुद्धीकरण विभागले अनुसन्धान गर्दै आएको भन्दै तत्काललाई उनको पासपोर्ट रोक्का गरिएको अध्यागमन विभाग स्रोतले जानकारी दियो।
स्रोतका अनुसार सम्पत्ति शुद्धीकरण विभागले चैत १५ को मिति राखेर अध्यागमन विभागलाई पठाएको पत्र अनुसार व्यवसायी भट्टको पासपोर्ट रोक्का गरिएको हो।
'निज व्यक्तिको पासपोर्ट रोक्का राखिदिनू भन्ने एक लाइनको पत्र आएको हो,' अध्यागमन विभाग स्रोतले भन्यो, 'हामीले त्यस आधारमा आज मंगलबारबाट उनको पासपोर्ट रोक्का राखेका छौं।'
सम्पत्ति शुद्धीकरण विभागले व्यापारी र उच्च तहका नेता तथा पदाधिकारीहरूसँग कनेक्सन राखेर काम गरेको भन्दै २६ जनाभन्दा बढीको विषयमा केही समयदेखि अनुसन्धान गर्दै आएको थियो। त्यही अनुसन्धान क्रममा भट्टको गतिविधिबारे केही गम्भीर तथ्य देखापरेकाले पासपोर्ट रोक्का गर्नुपरेको विभाग स्रोतले जनाएको छ।
केही समयमै उनको अनुसन्धान सकिने र मुद्दा पनि लगिने स्रोतले बताएको छ।
-1746009348.jpg)
