राष्ट्रिय सभाकी नवनिर्वाचित उपाध्यक्ष लिलाकुमारी भण्डारी पदभार ग्रहण गरेकी छन्।
मंगलबार शपथ ग्रहणलगत्तै सिंहदरबारस्थित कार्यकक्षमा पुगेर भण्डारीले पदभार सम्हालेकी हुन्।
पदभार ग्रहणपछि सञ्चारकर्मीसँग कुरा गर्दै उनले साइबर बुलिङमार्फत महिलामाथि हुने चरित्रहत्याविरूद्ध कानूनी व्यवस्था आवश्यक रहेको बताइन्।
उनले महिलाको मानप्रतिष्ठा र सामाजिक आचरणमा असर पर्ने गरी चरित्रहत्या गर्ने जस्ता आपराधिक गतिविधि मौलाउँदै गएको भन्दै त्यसको नियन्त्रणका लागि कानून निर्माण अपरहार्य भएको बताइन्।
भण्डारीले सामाजिक सञ्जालमार्फत महिलामाथि भइरहेको साइबर हमलाले विकराल रूप लिँदै गएको उल्लेख गर्दै यसलाई नियन्त्रण गर्न सरकार र सरोकारवालाहरूबीचको समन्वय गरेर कानूनी हस्तक्षेप गर्नुपर्ने बताइन्।
उनले साइबर अपराधको सिकार भएकै कारण सांसदहरू नै प्रहरीको साइबर ब्यूरोसम्म पुग्नु दुःखद् भएको बताइन्।
उपाध्यक्ष भण्डारीले सभ्य र मर्यादित समाज निर्माणका लागि साइबर अपराध नियन्त्रणमा सबै पक्ष एकजुट हुनुपर्नेमा जोड दिइन्।
उनले भनिन्, ‘गला रेट्नु मात्रै अपराध होइन। मान्छेलाई समाजमा बाँच्नै नसक्ने गरी जसरी नेगेटिभ रूपमा प्रयोग भइरहेको छ। विशेषगरी महिलाहरूको मान, प्रतिष्ठा र सामाजिक आचरणमा प्रभाव गर्ने गरी चरित्रहत्या गर्ने गरिएको छ। महिलाको जीवन सिध्याउनुपर्नेछ भने उसको चरित्र हत्या गरिदिएपछि हुन्छ भनेर जसरी साइबर बुलिङहरू भइरहेका छन्, त्यसविरूद्ध धेरै माननीय सदस्यहरू पनि प्रहरीको साइबर ब्युरोमा जानुभइरहेको मैले देखेको थिएँ।’
उनले अगाडि भनिन्, ‘अब यसलाई कानूनी माध्यमबाट रोक्नुपर्छ। साइबर हमलामार्फत् महिलाको चरित्रमाथि प्रश्न गर्ने, हेर्न र पढ्नै नमिल्ने खालका शब्दहरूबाट प्रहार गर्ने खालको जुन आपराधिक क्रियाकलाप बढिरहेको छ यसको लागि सरकारले पनि छिट्टै सोच्ने छ र हामी सबैले यो समाजलाई सभ्य र मर्यादित समाज बनाउने हो भने कानूनमार्फत महिलाको चरित्र हत्या गर्न साइबर बुलिङ गर्ने जुन विकृतिले विकराल रूप लिँदैछ यसको अन्त्य गर्नुपर्छ। यस विषयमा अहिले संसद र संसदबाहिर पनि चर्को रूपमा आवाज उठिरहेको देखेको छु।’
उनले राष्ट्रिय सभा उपाध्यक्षको पद कुनै आग्रहबिना निष्पक्ष र संसदीय गरिमा कायम राख्दै बहन गर्ने प्रतिबद्धता समेत व्यक्त गरिन्। –न्युज एजेन्सी नेपाल
-1746009348.jpg)
