राष्ट्रिय प्रजातन्त्र पार्टीकी सांसद खुस्बु ओलीले राजनीतिक संस्कारको परीक्षणमा राष्ट्रिय स्वतन्त्र पार्टी असफल भएको बताएकी छन्।
उपसभामुखमा सरस्वती लामालाई निर्वाचित गरियोस् भन्ने प्रस्तावको समर्थन गर्र्दै सांसद ओलीले उपसभामुख पदको सन्दर्भमा बनेको समझदारी अन्तिम घडीमा लत्याइएको बताएकी छन्।
‘यस गरिमामय संसद संविधान र सदनका नियम–नियमावलीहरूले मात्र टिकेको हुँदैन। यस गरिमामय संसद दलहरूबीचको विश्वास समझदारी प्रतिबद्धता र विशेषगरी जिम्मेवार राजनीतिक संस्कारमा टिकेको हुन्छ,’ उनले भनिन्, ‘सत्तारूढ दलसँगको संवादपछि उपसभामुख पदको सन्दर्भमा बनेको समझदारी अन्तिम घडीमा लत्याइयो,’ उनले भनिन्।
यस विषयले दलहरूबीच विश्वास भन्ने कुरा कति सस्तो रहेछ भन्ने कुरा प्रस्टाइदिएको उनले आरोप लगाइन्।
‘दलहरूबीचको ट्रस्ट डेफिसिट संस्थागत हुँदै गएको छ। हामीले हिजो दिएको उम्मेदवारी कुनै पद प्रतिको तृष्ण थिएन। यो यसै पनि प्रतिपक्षको अधिकार नै थियो,’ उनले भनिन्।
राष्ट्रिय स्वतन्त्र पार्टीसँगको समझदारीपछि नया ऊर्जा र प्रतिपक्षमै रहेर भए पनि सहकार्यको सम्भावनामा सकारात्मक भएर राप्रपा अगाडी बढेको उनले बताइन्।
‘यो संविधानले प्रतिपक्षलाई निहित गरेको पदको मात्र प्रश्न होइन, यो राजनीतिक आचरण र विश्वसनीयताको पनि परीक्षण थियो। राजनीतिक संस्कारको पनि परीक्षण थियो। जसमा सत्तारूढ दलले आफूलाई असफल साबित गरेको छ,’ उनले भनिन्।
सहकार्यको आधार विश्वास मानिने तर पछिल्लो समय अविश्वासलाई नै नयाँ राजनीतिक संस्कार र नयाँ पोलिटिकल करेन्सीमा परिणत गरिएको उनले आरोप लगाइन्। यसैलाई संस्थागत गरिएको उनको तर्क छ।
‘त्यसैले मेरो सिधा प्रश्न छ– राजनीतिक प्रतिबद्धता अब परिस्थितिअनुसार बदलिने अप्सन मात्र हो कि त्यसमा कुनै नैतिक राजनीतिक दायित्व पनि बाकी छ?,’ उनले भनिन्।
-1746009348.jpg)
