नेपाली कांग्रेसका नेता अर्जुननरसिंह केसीले संसदीय दल नेता चयन गर्न मापदण्ड बनाउनुपर्ने बताएका छन्।
कांग्रेसले वैशाख २ गते संसदीय दल निर्वाचनका लागि कार्यतालिका ल्याउने र वैशाख ४ गते चुनाव गर्ने बताएको छ।
यसतर्फ लक्ष्य गर्दै प्रतिनिधि सभा सांसदसमेत रहेका पूर्वसहमहामन्त्री केसीले संसदीय दल नेता चयन गर्न अब ढिला नगर्न आग्रह गरेका हुन्।
उनले युवा वा वरिष्ठलाई संसदीय दल नेता बनाउनुपर्ने र सकेसम्म सर्वसम्मत गर्न आफूले पनि सहयोग गर्ने आज सामाजिक सञ्जाल एक्समार्फत् बताएका छन्।
प्रतिनिधि सभामा कांग्रेसका ३८ जना सांसद छन्।
यस्तो छ केसीको भनाइ-
प्रतिनिधिसभाको प्रमुख विपक्षी दल नेपाली कांग्रेस संसदीय दलको नेता चयनमा पार्टीभित्र बहस र बाहिर चासो हुनु स्वाभाविक हो। तर ‘को’ किन र ‘कस्तो’ नेता चाहिन्छ भन्नेमा हाम्रो स्पष्ट मापदण्ड तय हुनु आवश्यक छ।
मेरो कारणले ढिलाइ भयो भन्ने वा नाता र नेताका भास्य पनि बाहिर छ्याप्छ्यप्ती आएका छन्। यो असत्य र भ्रामक हो। मैले पार्टीभित्र र सार्वजनिक रूपमा नै भनिनै सकेको छु- सहमतिको मापदण्ड बनाऔं र सकेसम्म सर्बसम्मति गरौं। मेरो पूर्ण समर्थन हुनेछ।
सबैभन्दा युवालाई गरौं वा सबैभन्दा वरिष्ठलाई, प्रत्यक्ष वा समानुपातिक जुनसुकै प्रक्रियाबाट आएका भए पनि सांसद भएपछि विभेद उचित हुँदैन। तर पनि निर्वाचित नै गर्न हो भने निश्चित मापदणडको आधारमा योग्यतामा आधारित, न्यायोचित र तार्किक निर्णयमा पुगौं।
संसदीय दलको नेता केबल पद होइन, प्रभावकारी प्रतिपक्षी भूमिका निर्वाह गर्ने जिम्मेवारी हो। त्यसैले ढिलाइ होइन, परिपक्व र सक्षम निर्णय आवश्यक छ। सहमति हुन नसके तत्काल निर्वाचनमार्फत निर्णय मा पुगौं, अब ढिलाइ नगरौं।
-1746009348.jpg)
