सिके राउत नेतृत्वको जनमत पार्टीमा विवाद देखिएको छ।
मधेस सरकारमा निरन्तर रहने कि बाहिरिने भन्नेमा जनमत पार्टीभित्र विवाद देखिएको हो।
पार्टी र मधेसका अधिकांश सांसदहरू सरकारबाट बाहिरिने पक्षमा छन्।
अध्यक्ष राउतले पार्टी संसदीय दल नेता पनि परिवर्तन गरेका छन्।
सोमबार अध्यक्ष राउतले सांसद चन्दनकुमार सिंहलाई संसदीय दल नेता बनाएका हुन्। उनले सोमबार नै प्रदेश प्रमुखलाई पत्र पठाएर सरकारलाई समर्थन कायम नरहेको उल्लेख गरेका थिए।
यसअघि सांसद महेशप्रसाद यादव संसदीय दल नेता थिए।
वैशाख ११ गते जनमत मधेस संसदीय दल बैठक बसेको थियो। मधेसमा जनमतका १२ सांसद छन्। तीमध्ये ९ जना नेपाली कांग्रेसका संसदीय दल नेता कृष्णप्रसाद यादव नेतृत्वको अहिलेको सरकारबाट बाहिरिने पक्षमा उभिएका थिए।
यादव नेतृत्वको सरकारमा जनमतका २ जना मन्त्री छन्। सांसद महेशप्रसाद यादव अर्थमन्त्री र सांसद बसन्त कुशवाहा खेलकुद मन्त्री छन्। ती मन्त्रीहरूलाई पार्टीले फिर्ता आउन भनेको छ।
तर संसदीय दल नेताकै हैसियतमा महेशप्रसाद यादवले सरकारलाई निरन्तर समर्थन रहेको पत्र पठाएका छन्।
आज प्रदेश प्रमुखलाई पत्र पठाएर यादवले वर्तमान सरकारलाई समर्थन रहेको उल्लेख गरेका छन्। आफू संसदीय दल नेता नै रहेको र आफूले दलको बैठकसमेत नराखेको उनले पत्रमा उल्लेख गरेका छन्।
सरकारको कार्यशैलीलाई लिएर पार्टीभित्र असन्तुष्टि देखिँदै आएको छ।
-1746009348.jpg)
