प्रतिनिधि सभाको बैठक सुरू भएको आधा घण्टाभित्रै अब सांसदहरूको हाजिरी सार्वजनिक गरिने भएको छ।
सभामुख डोलप्रसाद अर्यालले वैशाख २८ गतेबाट सुरू हुने संसद बैठकमा विद्युतीय हाजिरीको व्यवस्था गर्न लागेका हुन्। यसअघि नयाँ बानेश्वरस्थित संसद भवनमा पनि विद्युतीय हाजिरीको व्यवस्था गरिएको थियो। २०८२ साल भदौ २३ र २४ गते भएको जेनजी आन्दोलनमा उक्त भवनमा आगजनी भएको थियो।
अहिले सिंहदरबारस्थित निर्माणाधीन संघीय संसदको भवनको बहुउद्देश्यीय हलमा बैठक बस्दै आएको छ। प्रतिनिधि सभाको अघिल्लो अधिवेशनमा सांसदहरूले हाजिर कापीमा हाजिरी गरेका थिए। तर अब भने विद्युतीय हाजिरी अनिवार्य गर्न लागिएको हो।
'उदाहरणका लागि अब दिउँसो १ बजे संसद बैठक सुरू भयो भने १ बजेर ३१ मिनेटमा सांसदहरूको हाजिरी सार्वजनिक हुन्छ,' सभामुख अर्यालकी प्रमुख स्वकीय सचिव मूना कुँवरले सेतोपाटीसँग भनिन्, 'यसले सांसदहरूलाई समयमै बैठकमा जान प्रेरित गर्छ। ढिला आउने को रहेछन् भन्ने जनताले थाहा पाउँछन्।'
तर बैठकमा ढिला आए पनि सांसदहरूले हाजिरी गर्न भने पाउने छन्।
सभामुख अर्यालले प्रतिनिधि सभाको नयाँ अधिवेशनबाट सुन्न नसक्ने व्यक्तिहरूका लागि सांकेतिक भाषामा पनि बैठकका गतिविधि जानकारी गराउने व्यवस्था गर्ने भएका छन्। त्यसका लागि महिला बालबालिका तथा जेष्ठ नागरिक नागरिक मन्त्रालयले संसद सचिवालयलाई कर्मचारी पठाउने भएको छ।
कुँवरले सभामुख अर्यालले संसदलाई सूचना प्रविधि मैत्री बनाउने गरी काम गरिरहेको बताइन्।
-ink-1776327674.jpeg)
-1746009348.jpg)
