राष्ट्रिय स्वतन्त्र पार्टी (रास्वपा) का सांसद रमेश प्रसाईंले नेकपा एमालेका अध्यक्ष केपी शर्मा ओली र कांग्रेस नेता रमेश लेखकलाई मुद्दा नचलाइएकोमा प्रश्न उठाएका छन्।
प्रतिनिधि सभाको शून्य समयमा प्रसाईंले सरकारले सहिदप्रतिको श्रद्धाञ्जलि व्यवहारबाट पुष्टि गर्नुपर्ने बताए।
वालेन्द्र शाह नेतृत्वमा नयाँ सरकार गठन भए लगत्तै जेनजी आन्दोलनका बेला प्रधानमन्त्री रहेका केपी शर्मा ओली र तत्कालिन गृहमन्त्री रमेश लेखकलाई पक्राउ गरिएको थियो। उक्त घटनामा सरकारले दुबैजनालाई पक्राउ गरेर बयान लिएको थियो।
तर अहिलेसम्म सरकारले उक्त घटनामा दुवै विरूद्ध मुद्दा दर्ता गरेको छैन।
मुद्दा दर्ता नगरिएको विषयमा प्रसाईंले सरकारलाई प्रश्न उठाएका हुन्।
'सहिदप्रतिको श्रद्धाञ्जलि मुखले औपचारिकता निभाएर होइन मैले प्रतिनिधित्व गर्ने सरकारको व्यवहारबाट पुष्टि हुनुपर्छ,' प्रसाईंले भने, 'जेनजी आन्दोलन र नरसंहारका अभियुक्तद्वय तत्कालीन प्रधानमन्त्री र गृहमन्त्री विरूद्ध मुद्दा बुझाउन सरकारलाई केले अड्कायो। प्रमाण पुगेन कि प्राथमिकता पुगेन।'
उनले विगतमा मल्लिक आयोग, रायमाझी आयोग र लाल आयोगको प्रतिवेदन थन्काइए जसरी अहिले पनि थन्काउन खोजिएको हो कि भन्दै प्रश्न गरे।
