नेकपा एमालेका सांसद मनमाया बिकले सुकुम्बासीहरूलाई हटाएर होल्डिङ सेन्टरमा पुर्याइएको विषयलाई हिटलरले यहुदीहरूलाई ग्यास चेम्बरमा लगेको घटनासँग तुलना गरेपछि राष्ट्रिय स्वतन्त्र पार्टी (रास्वपा) का सांसद सुशान्त वैदिकले नियमापत्ति जनाएका छन्।
आफूले सुकुम्बासी परिवारलाई राखिएको ठाउँ अवलोकन गरेको उल्लेख गर्दै बिकले उनीहरू सरकारसँग डराएको बताएकी थिइन्।
'दोस्रो विश्वयुद्धमा लाखौं यहुदी हिटलरको ग्यास चेम्बरमा मर्न लुरूलुरू गएका थिए। उनीहरू हिटलरसँग खुसी भएर गएका थिएनन्। उनीहरू त हिटलरसँग डराएर बिनाप्रतिरोध ग्यास चेम्बरमा मर्न गएका थिए,' बिकले भनिन्, 'अहिले बिनाप्रतिरोध घरबास छाडेका सुकुमबासीहरूको हाल यस्तै छ।'
बिकले भनेकी थिइन्, 'होल्डिङ सेन्टरमा वृद्ध बुबाआमाले भोको पेटमा औषधि खानुपरेको, गर्भवती र बालबालिकाहरूले उचित गाँस र बास नपाएको र विद्यालय जान नपाएको, आँखामा डोजरले घर भत्काएको दृश्यले सुत्न नसकेका घटना ज्यादै दु:खदायी छन्। उनीहरूको बाँच्ने रहर मर्दै गएको छ। उनीहरू मानसिक स्वास्थ्यका हिसाबले जोखिममा छन्। घरमा बाँधेर राखेको गाईवस्तुलाई झैं दुई मुठी सास अल्झाउने गरी दुई गाउँ दिँदैमा राज्यको दायित्व पूरा हुँदैन।'
बिकले यसरी हिटलर र ग्यास चेम्बरसँग सरकारको कामको तुलना गरेको भन्दै रास्वपा सांसद सुशान्त वैदिकले आपत्ति जनाए।
'सदनमा सरकारको आलोचना गर्ने क्रममा विश्व इतिहासकै घृणित अमानवीय र संवेदनशील विषय हिटलर तथा ग्यास चेम्बरसँग तुलना गरिएको अभिव्यत्तिमा नियमापत्ति जनाउन चाहन्छु,' वैदिकले भने, 'यो तुलना असंसदीय मात्र होइन, लाखौं मानिसमाथि भएको ऐतिहासिक नरसंहारप्रति अपमानजनक र असंवेदनशील पनि छ। संसदजस्तो गरिमामय ठाउँको भाषा जिम्मेवार, मर्यादित र तथ्यमा आधारित हुनुपर्छ। रेकर्डबाट फिर्ता लिन निर्देशन गरियोस्।'
वैदिकले नियमापत्ति जनाएपछि सभामुख डोलप्रसाद अर्यालले ध्यानाकर्षण भएको जनाएका थिए।
