राष्ट्रपति रामचन्द्र पौडेलले नीति तथा कार्यक्रम प्रस्तुत गर्दागर्दै संसद बैठक छाडेर हिँडेका र अहिलेसम्म संसदमा एक शब्द नबोलेका प्रधानमन्त्री बालेन शाहले बुधबार नीति तथा कार्यक्रममा जबाफ पनि आफैले नदिने भएका छन्।
सामान्यतया सरकारको नीति तथा कार्यक्रममा उठेका प्रश्नको जवाफ प्रधानमन्त्रीले नै दिने परम्परा छ। यस अनुसार बुधबार संसद सचिवालयले सार्वजनिक गरेको सम्भावित कार्यसूचीमा प्रधानमन्त्री शाहले सरकारको वार्षिक नीति तथा कार्यक्रममाथि छलफल क्रममा उठेका प्रश्नको जबाफ दिने उल्लेख थियो।
तर कार्यसूचीमा उल्लेख भए पनि प्रधानमन्त्री बालेनले नीति तथा कार्यक्रममा जबाफ नदिने भएका हुन्। उनको सट्टा अर्थमन्त्री डा. स्वर्णिम वाग्लेले सरकारको तर्फबाट जबाफ दिने तय भएको रास्वपाका एक नेताले जानकारी दिए।
'अहिले मन्त्रिपरिषद बैठक सुरू भएको छ। आज अर्थमन्त्री स्वर्णिम वाग्लेले नीति तथा कार्यक्रममाथि उठेका प्रश्नको जबाफ दिनुहुनेछ,' उनले सेतोपाटीसँग भने।
हामीले यसबारे रास्वपाका तीन जना नेतासँग छुट्टाछुट्टै कुरा गरेका थियौं। तीनै जनाले प्रधानमन्त्रीले नीति तथा कार्यक्रममा उठेका प्रश्नको जबाफ नदिने पुष्टि गरे।
यसको कारण भने आफूहरूलाई थाहा नभएको उनीहरूले बताए।
संघीय संसदअन्तर्गत प्रतिनिधिसभा बैठक बुधबार बिहान ११ बजे बस्दैछ।
बैठकमा राष्ट्रपति रामचन्द्र पौडेलले सोमबार संघीय संसदको दुवै सदनको संयुक्त बैठकमा प्रस्तुत गरेको वार्षिक नीति तथा कार्यक्रममाथि छलफल प्रारम्भ गरियोस् भनी प्रस्ताव प्रस्तुत हुनेछ।
त्यस्तै, वार्षिक नीति तथा कार्यक्रममाथि सांसदहरूबाट प्राप्त संशोधनहरू प्रस्तुत हुने र सरकारको वार्षिक नीति तथा कार्यक्रममाथि छलफल गरिने सम्भावित कार्यसूचीमा उल्लेख छ।
त्यसपछि सरकारको वार्षिक नीति तथा कार्यक्रममाथि प्राप्त संशोधनलाई निर्णयार्थ प्रस्तुत गरिने कार्यसूची रहेको संसद सचिवालयले जानकारी दिएको छ।
आजै सरकारको वार्षिक नीति तथा कार्यक्रमलाई निर्णयार्थ प्रस्तुत गरिने कार्यसूचीमा उल्लेख छ।
प्रधानमन्त्री शाह सोमबार राष्ट्रपतिले नीति तथा कार्यक्रम वाचन गरिरहँदा संसदीय मर्यादा विपरीत बैठक छाडेर हिँडेको घटनालाई लिएर तीव्र आलोचना भइरहेको छ। मंगलबार प्रतिनिधिसभा बैठकमा प्रतिपक्षी सांसदहरूले यसबारे सरकारको जबाफ मागेका थिए।
यसअघि संसदको पहिलो अधिवेशनमा एक शब्द नबोलेका प्रधानमन्त्री बालेनले अहिलेसम्म संसदमा चुप छन्।
