प्रधानमन्त्री बालेन शाहको उपस्थितिको माग गरेर विपक्षी दलहरूले सदन अघि बढ्न नदिएपछि प्रतिनिधि सभाको बैठक बुधबार दोस्रो पटकका लागि स्थगित भएको छ।
यसअघि १५ मिनेट स्थगित भएर फेरि सुरू भएको बैठकमा पनि विपक्षी दलहरूले प्रधानमन्त्री खोज्दै बैठक अघि बढ्न दिएनन्। सभामुख डिपी अर्यालले १५ मिनेटका लागि बैठक स्थगन गरेका छन्।
संसद बैठकमा हर्क साम्पाङ नेतृत्वको श्रम संस्कृति पार्टी उपस्थित छैन।
प्रधानमन्त्री बालेन्द्र शाहको राजीनामा माग्दै प्रतिनिधि सभाको बैठक बहिष्कार गरेको श्रम संस्कृतिका अध्यक्ष साम्पाङले भने सामाजिक सन्जालबाट प्रधानमन्त्रीविरूद्ध निशाना लगाइरहेका छन्।
यसअघि प्रधानमन्त्री शाहको सट्टा अर्थमन्त्री स्वर्णिम वाग्लेलाई नीति तथा कार्यक्रम माथिको छलफलको प्रस्ताव राख्न रोष्टममा डाकेपछि विपक्षी दलहरूले विरोध जनाएका थिए।
प्रधानमन्त्री शाह आज संसदमा उपस्थित छैनन्।
विपक्षी दलहरू नेपाली कांग्रेस, नेकपा एमाले, नेकपा, राप्रपा र श्रम संस्कृति पार्टीका सबैले उठेर विरोध जनाएका थिए।
श्रम संस्कृति पार्टीका अध्यक्ष साम्पाङले भने प्रधानमन्त्रीलाई असक्षम भन्दै राजीनामा माग गरेका थिए।
‘प्रधानमन्त्री राजीनामा दे’, साम्पाङले चिच्याउँदै भनेका थिए ‘असक्षम प्रधानमन्त्री राजीनामा दे। असक्षम प्रधानमन्त्री राजीनामा दे। यस्ता प्रधानमन्त्री चाहिँदैन।’
साम्पाङले विधीबाट संसद चलाउन समेत सभामुखलाई आग्रह गरेका थिए।
‘यो देशमा प्रधानमन्त्री छैन भने छैन भन्नुस्,’ साम्पाङले भनेका थिए, ‘प्रधानमन्त्री छैन भने प्रधानमन्त्री बिनाको सरकार भन्नुपर्यो। नत्र भने अनिवार्य उपस्थिति हुनुपर्छ। संसदमा सम्बोधन नगर्ने प्रधानमन्त्री हुन्छ?’
लगत्तै साम्पाङका पार्टीका सांसदहरू बैठकबाट बाहिरिएका थिए।
श्रम संस्कृतिले बहिष्कार गरेपछि पनि केहीबेर संसदमा सभामुख, विपक्षी र रास्वपा सांसदहरूबीच जुहारी चल्यो। बैठक अघि बढ्ने अवस्था नभएपछि १५ मिनेट स्थगित भयो।
त्यसपछि सुरू भएको बैठकमा हर्क सहितका श्रम संस्कृतिका सांसदहरू उपस्थित भएनन्।
बरू अरू बेला जस्तै हर्कले फेसबुकबाट भने प्रधानमन्त्रीविरूद्ध फायर खोलिरहेका छन्।
‘प्रधानमन्त्रीले संसदलाई बेवास्ता र अपमान गर्नु भनेको जनतालाई हेप्नु हो,’ हर्कले लेखेका छन्।
फेसबुकमै अर्को स्टाटस लेख्दै उनले भनेका छन्, ‘प्रधानमन्त्री नआई नीति तथा कार्यक्रममा के छलफल गर्नु? कर्तव्य पूरा गर्न नसक्ने प्रधानमन्त्री असक्षम हो।’
-1778580493.jpg)
