श्रम संस्कृति पार्टीका अध्यक्ष एवम् सांसद हर्क साम्पाङले नीति कार्यक्रममाथिको छलफलमा प्रधानमन्त्री नआएको र पेस गर्न पनि अर्थमन्त्री तोकेकोबारे आपत्ति जनाएका छन्।
श्रम संस्कृति पार्टीले बुधबार पनि संसद बैठक बहिष्कार गरेको थियो।
‘नीति तथा कार्यक्रमको यो छलफलमा प्रधानमन्त्रीज्यू हुनुहुन्न। यो विषयमा म आपत्ति जनाउन चाहन्छु। सरकारको प्रमुख नेतृत्व गरिरहनुहुने, उहाँले नै पेश गरेको नीति तथा कार्यक्रममा हामी छलफलमा छौं,’ उनले भने, अरूबाट हामीले सुन्नुपर्ने स्थिति होइन। यो एउटा सामाजिक परम्परा छ नि, आफ्नो बिहेमा अरूलाई बेहुला पठाएर हुँदैन।’
अहिले नीति कार्यक्रममा सुन्न प्रधानमन्त्री नआए पनि जवाफ दिन आउने विश्वास व्यक्त गरे। ‘म माग गर्न चाहन्छु– उहाँ यहाँ उपस्थित भएर, उहाँले छलफलमा सुन्नुभएन, तर उत्तर दिने क्रममा उहाँ आउनुहुनेछ भन्ने मैले विश्वास लिएको छु,’ उनले भने।
प्रधानमन्त्री बालेन शाह जवाफ दिन नआए श्रम संस्कृति पार्टी बाहिरिने उनले बताए। ‘उहाँ आउनुहुन्न भने हामी श्रम संस्कृति पार्टी बाहिरिने छौं,’ उनले भने।
संसदमा सांसदहरूले व्यक्त गरेको राम्राराम्रा विचार आफूले सुनेको बताए।
‘सम्भवतः अघिल्लो रोमा बसेर धेरै समय मैले नै सुनेँ होला। जीवन सिकाइ हो, हरेक पल हामीले सुनिरहनुपर्छ। अरूले के भन्छन्, हामीले सिकिरहनुपर्छ। यति महत्त्वपूर्ण विषयमा छलफल गरिरहँदा सरकारका प्रमुख, जसले नीति तथा कार्यक्रम प्रस्तुत गर्नुभएको हो। उहाँले हामीलाई सुनिरहनुभएको छैन। उहाँले लाइभमा सुनिरहनुभएको छ। अथवा भरे सुन्नुहुन्छ भन्ने कुरा पनि होला। तर यो संसदको मर्यादाविपरीत छ। संसदको परम्पराविपरीत पनि छ,’ उनले भने।
-1778580493.jpg)
