नेपाली कांग्रेस संसदीय दलका उपनेता तथा सांसद अभिषेकप्रताप शाहले निवर्तमान गृहमन्त्री सुधन गुरूङले सार्वजनिक गरेको सम्पत्ति विवरण अस्वाभाविक र शंकास्पद देखिएकोले निष्पक्ष छानबिन गर्नुपर्ने बताएका छन्।
प्रतिनिधि सभाको आजको बैठकमा बोल्दै उनले भने, ‘पूर्वगृहमन्त्री सुधन गुरूङले सार्वजनिक गर्नुभएको सम्पत्ति विवरण अत्यन्तै अस्वाभाविक र शंकास्पद देखिएकाले यसमाथि तत्कालै निष्पक्ष छानबिन हुनुपर्दछ।’
उनले 'संशयको घेरामा रहेका पूर्व गृहमन्त्रीलाई चोख्याउन र बचाउनका लागि आयोग नै लागिपरेको जनस्तरमा व्यापक आशंका र चर्चा' रहेको पनि सुनाएका थिए।
‘कुनै पनि शक्तिशाली पदमा बसेको व्यक्तिले कानुनभन्दा माथि रहने उन्मुक्ति पाउनु हुँदैन र आयोगले कसैको दबाब वा प्रभावमा परेर चोख्याउने काम नगरोस्। प्रतिनिधि सभा जनताको विश्वास को केन्द्र हो तसर्थ, यो सदनमार्फत म सरकारसँग माग गर्दछु कि आयोगको गतिविधिमाथि निगरानी राखियोस् र पूर्व गृहमन्त्रीको सम्पत्तिको उच्चस्तरीय र पारदर्शी छानबिन सुनिश्चित गरियोस्,’ उनले भने।
