मन्त्रीजस्तो जिम्मेवार पदमा बसेर काम नगर्ने ठेकेदारको 'खुट्टा भाँच्नू' भनी सार्वजनिक रूपमा निर्देशन दिएपछि पूर्वाधार विकास मन्त्री सुनिल लम्साल विवादमा परेका छन्।
उनले आइतबार नागढुंगा–मुग्लिङ सडक योजनाको निरीक्षण क्रममा बिजुलीको पोल नसार्ने ठेकेदारको 'खुट्टा भाँच्न' निर्देशन दिएका छन्।
उनले यस्तो निर्देशन दिँदा मन्त्रालयका सचिव गोपालप्रसाद सिग्देल, धादिङकी प्रमुख जिल्ला अधिकारी लक्ष्मी पाण्डेय र प्रहरी उपरीक्षक सुमित खड्का अगाडि नै थिए।
मन्त्री लम्सालले दिएको निर्देशनको भिडिओ अहिले सामाजिक सञ्जालमा भाइरल छ।
'यिनीहरूको यो जुन पोल छ, बिजुलीको पोलको कन्ट्र्याक्टर कहाँ छ? यो धर्तीमा कहाँ छ? त्यसलाई खोजेर यहाँ लिएर आउनू। त्यसलाई पनि यहाँ राख्नू। घर पठाउने होइन। त्यसले काम गरेन भने खुट्टा भाँचिदिनू, मतलब भएन,' उनले भने, 'यिनीहरूले चाँडै भन्दा चाँडै पोल सार्न पर्यो। यहाँको पब्लिकले धेरै दु:ख पायो। उनीहरूलाई काम गर्न लगाउन पर्यो राम्रोसँग। यो पोलको है, बिजुलीको पोलको।'
मन्त्री जस्तो जिम्मेवार पदमा बसेर यस्तो निर्देशनपछि मन्त्री लम्सालको तीव्र आलोचना भइरहेको छ।
धादिङकी प्रमुख जिल्ला अधिकारी लक्ष्मी पाण्डेयले मन्त्री लम्सालले समयमा काम गर्न भनेर निर्देशन दिएको बताइन्।
'उहाँ हिजो निरीक्षणका लागि आउनुभएको थियो। हामी पनि जिल्ला सुरक्षा समितिको टिम गएका थियौं। त्यस क्रममा उहाँले काममा ढिलासुस्ती नगरौं भन्ने निर्देशन दिनुभएको हो,' उनले भनिन्।
नागढुंगा-मुग्लिन सडक योजना (पश्चिम खण्ड) की आयोजना प्रमुख एवं सिडिई सजना अधिकारीले सडक विभाग र नेपाल विद्युत प्राधिकरणबीच तीन वर्ष अगाडि नै बिजुलीको पोल सार्ने सम्झौता भएको बताइन्।
'बिजुलीका पोलहरू विद्युत प्राधिकरणले सार्न पर्ने भन्ने थियो। प्राधिकरणले पनि ठेक्का लगाएको थियो। तर ठेकेदार कम्पनीले सार्नुपर्ने पोल सारेको छैन। अहिले हाम्रो बाटोमा काम गर्ने ठाउँ नै भएन। पोल नहट्दा अप्ठ्यारो भएको छ,' उनले भनिन्।
पश्चिम खण्डमा १०७ वटा पोल सार्न बाँकी रहेको र पूर्वी खण्डमा पनि ८० भन्दा बढी पोल सार्न बाँकी रहेको उनले बताइन्।
आइतबार मन्त्री लम्साल बुटवलदेखि निरीक्षण गरी काठमाडौं फर्किएका थिए।
मन्त्री लम्सालले यसअघि पनि निर्माण व्यवसायीमाथि विवादास्पद काम गरेका छन्। उनले नै निर्माण व्यवसायी रमेश शर्मा र पिताम्बर बडूलाई काठमाडौं उपत्यका अपराध अनुसन्धान कार्यालयको प्रहरी टोली लगाएर नियन्त्रणमा लिएका थिए।
उनको निर्देशनमा कार्यालयको टोलीले दुई निर्माण व्यवसायीलाई नियन्त्रणमा लिएर मन्त्रालयमा पठाएको थियो।
यो विषयमा मन्त्रालयले पछि उनीहरूलाई छाडेको थियो।
त्यसो त प्रधानमन्त्री बालेन शाहले नै गत फागुन ६ गते धनगढीमा आयोजित चुनावी सभामा 'काम नगर्ने ठेकेदारलाई रूखमा बाँध्ने, बाटोमा सुताउने, खोरमा जाक्ने' बताएका थिए।
'खल्तीमा पैसा नभएका विपन्नले शिक्षा पाउनुपर्यो, यो हो हाम्रो एजेन्डा। विपन्न गरिबले स्वास्थ्योपचार पाउनुपर्यो, यो हो हाम्रो एजेन्डा। दुई वर्षमा बन्नुपर्ने सडक २० वर्षसम्म बन्दैन। त्यो डेढ वर्षमा बन्नुपर्यो त्यो हो हाम्रो एजेन्डा। रूखमा बाँधेर हुन्छ कि बाटोमा सुताएर हुन्छ कि खोरमा जाकेर हुन्छ बाटो बन्नुपर्यो,' बालेनले भनेका थिए।
