सत्तारूढ राष्ट्रिय स्वतन्त्र पार्टी (रास्वपा)ले आफ्ना सांसदहरूलाई पार्टीको डिजिटल प्ल्याटफर्म 'पल्सआरएसपी'बारे अभिमुखीकरण दिने भएको छ।
पार्टीलाई डिजिटल बनाउँदै लैजाने प्रक्रियाअन्तर्गत बनाइएको पल्सआरएसपी नामको सिस्टमबारे जानकारी दिने र साइबर सुरक्षासम्बन्धी सचेतना समेत दिनेगरी शुक्रबार बैठक राखिएको छ।
बैठक बिहान १० बजे रास्वपा संसदीय दल कार्यालय सिंहदरबारमा राखिएको नेता कविन्द्र बुर्लोकोटीले जानकारी दिए।
पल्सआरएसपीमा हरेक सांसदले अनिवार्य रूपमा आफ्नो गतिविधि अपडेट गराउनुपर्नेछ। त्यसबाट एकअर्कासँग भेटघाटका लागि अनलाइनबाटै समय माग गर्न सकिने व्यवस्था गरिएको छ।
संसदमा बोल्ने विषयवस्तु समेत सोही सिस्टममा अपडेट हुनुपर्ने व्यवस्था गरिएको छ। त्यस्तै सांसदहरूले निर्वाचन क्षेत्रमा गरेको भ्रमण, भेटघाटजस्ता कार्यक्रमको जानकारी समेत सोही पोर्टलमार्फत गराउनुपर्ने भनिएको छ।
सांसदहरूले मात्रै होइन नागरिकले पनि आफ्नो निर्वाचन क्षेत्रका समस्या र गुनासो सोही पोर्टलमार्फत सम्बन्धित सांसदलाई राख्न सक्ने बनाइएको छ।
आजको बैठकलगत्तै हरेक सांसदले आफ्नो गतिविधि अनिवार्य रूपमा सिस्टममा अपडेट गराउनुपर्ने भनिएको बुर्लाकोटीले जानकारी दिए।
