बागमती प्रदेश सभामा शनिबार विनियोजन विधेयक माथिको छलफल थियो।
छलफलमा आर्थिक मामिला मन्त्रीलाई बजेटमाथि पूरक प्रश्न सोध्ने कार्यक्रम चलिरहेको थियो।
त्यसैक्रममा राप्रपाका सांसद नुरज ब्रजाचार्य आर्थिक मामिला मन्त्री प्रभात तामाङलाई प्रश्न सोध्न उठे।
उनले नेपाल भाषा (नेवारी)मा प्रश्न सोधे।
लगत्तै सभामुख अप्सरा चापागाईंले नेवारी भाषामा सोधिएको प्रश्न अनुवाद गरेर मन्त्रीलाई उपलब्ध गराउन निर्देशन दिइन्।
त्यसपछि थप ५ सांसदहरुले नेपाली भाषामै प्रश्न सोधे।
तर जबाफ दिने क्रममा मन्त्री तामाङले नेवारी भाषाको प्रश्नको उत्तर तामाङ भाषामा दिए। प्रदेश सभामा हाँसो गुञ्जियो। कतिपय सांसदहरुले टेबल ठोकेर समर्थन जनाए। नेवारी र तामाङ भाषा नबुझ्ने सांसदहरु भने रनभुल्लमा परे।
बागमती प्रदेशमा नेवारी र तामाङ भाषा सरकारी कामकाजको पनि भाषा हो। विगतमा सांसदहरु आफ्नो मातृ भाषामा बोल्ने तर सँगै नेपालीमा आफै उल्था पनि गरिदिन्थे। तर शनिबारको दृश्य भने प्रदेश सभाकै सांसदहरुका लागि पनि रोचक बन्यो। सभामा आ-आफ्नै भाषामा पहिलो पटक सवाल-जबाफ भयो।
बागमती प्रदेश सभाले सांसदहरुले नेवारी र तामाङ भाषामा बोल्न थालेपछि अनुवादक समेत राखेको छ। बैठकमा कोही व्यक्तिले यसरी बोल्दा उनीहरुले अनुवाद गर्छन्।
कतिपय सांसदहरुले भने यस्तो अनुवाद 'रियल टाइम' बैठक जारी रहँदा नै गर्नुपर्ने माग गर्दै आएका छन्। तर प्रदेश सभा सचिवालयले भने रियल टाइम अनुवादका लागि नियमावलीमा भएको केही प्रबन्ध परिमार्जन गर्नुपर्ने बताउँदै आएको छ।
प्रदेश सभाले शनिबार विनियोजन विधेयक पारित गरेको छ।
के सोधेका थिए सांसदले, के दिए मन्त्रीले जबाफ?
नुरज बज्राचार्यको प्रश्न– माननीय अर्थ मन्त्रीज्यूले लिएर आउनुभएको बजेट एकदमै राम्रो छ। तर जुन योजना स्थानीय तहबाट छनोट भएर आउने भनेको थियो त्यसमा मेरो क्षेत्रबाट आएको योजना खासै परेको देखिएन र सिलिङको योजना पनि नपरेको हुनाले प्रष्ट पारिदिनुहुन अनुरोध गर्दछु।
आर्थिक मामिला मन्त्री प्रभात तामाङको जबाफ– माननीयज्यूले अनुसूची-३ को विषयमा कुरा उठाउनुभएको छ। यो अनुसूची अन्तर्गत रहेको योजनाहरु पर्यो कि परेन भनेर जुन जिज्ञासा राख्नुभएको छ, यो कुरा चाँहि के भयो भने, जुन हामीले वितरण गरेको हरियो किताब छ त्यो चाँही अनुसूची ३ भरेर मात्र प्रविष्ट गरेर आएको हो। माननीयज्यूलाई म के अनुरोध गर्न चाहान्छु भने मैले अघि नै भनिसके फेरि दोहोर्याएर भन्छु यो सबै अनुसूचीमा भरेको योजनाहरु हामीले सम्बोधन गर्न सक्दैनौं। यसपटक हामीले सुरुवात गर्यौं, मैले सुरुवात गरेँ। यो काम गर्नका लागि सबै जनाले हातेमालो गरेर अगाडि बढाइदिनुपर्यो। यसरी जानुपर्यो। त्यसकारणले गर्दा माननीयज्यूलाई जुन कुरा उहाँले मलाई सोध्नुभएको छ, जुन प्रश्न छ, राम्रो सुरु गरेको छ सबैजना मिलेर अगाडि बढ्नुपर्छ।
-1783247358.jpg)
