नेपाली कम्युनिस्ट पार्टी (नेकपा)का संयोजक पुष्पकमल दाहाल 'प्रचण्ड'ले आफू र पार्टीका सह संयोजक माधव नेपाललाई 'सिध्याउने' खेलमा प्रधानमन्त्री बालेन शाह नरहेको बताएका छन्।
आइतबार काठमाडौंमा पार्टीले आयोजना गरेको कार्यक्रमलाई सम्बोधन गर्दै संयोजक प्रचण्डले ओलीकै स्तरमा बालेन सरकार लाग्ने गरी आफूहरूले कुनै कमी कमजोरी नगरेको बताएका हुन्।
'केही भएको भए बालेनजीको सरकारले माधवलाई र मलाई केही गर्नै पर्दैनथ्यो। केपी ओली नै काफी थियो। हाम्रो कहाँ, कति छ, कसरी फसाउने र कसरी सिध्याउने भन्नेमा ओलीले कम्ता खोजे?,' उनले भने, ' केपीको हाइटमा बालेनजी छैनन् हामीलाई सिध्याउन।'
महाधिवेशन पछि आफूलाई जेल हाल्ने कुरा दिन दिनै आएको पनि उनले बताए।
'माधवजीलाई त मुद्दा लगाएकै छ पहिलेकै सरकारले। प्रचण्डको कहिले १४० अर्ब दुबईमा छ भनेको छ। तपाईंहरूको पनि दिमाग खराब भएको होला, तीन चोटी त प्रधानमन्त्री भइसक्यो जस्तो लाग्दो हो। कताकता के–के हो के–के। केही भएको भए यो अहिलेको सरकारले गर्नै पर्दैनथ्यो। ओलीले नै गर्थे,' उनले भने।
तर पनि वामपन्थी आन्दोलन चाहिन्छ भनेर आफूहरू फेरि सहकार्यको कुरा पनि गरिराखेको उनले बताए।
'अब यो हाम्रो जिम्मेवारी बोध भन्नुस् उदारता भन्नुस्,' प्रचण्डले भने।
