नेपाली कांग्रेसले नेपाली जनसम्पर्क समितिहरूको अधिवेशन सुरू गरेको छ।
आइतबार नेपाली जनसम्पर्क समिति जापानको अधिवेशन सम्पन्न भएको छ।
अधिवेशनबाट अध्यक्षमा निर्विरोध रूपमा राजेन्द्र जमरकट्टेल निर्वाचित भएका छन्।
चुबाछी गार्डे सिबुया टोकियोमा भएको अधिवेशनको भर्चुअल रूपमा सभापति गगन थापाले उद्घाटन गरेका थिए।
कार्यक्रममा विशिष्ट अतिथिका रूपमा सहभागी रहन केन्द्रीय सदस्य अजयबाबु शिवाकोटी टोकियो पुगेका थिए।
नयाँ विधानमा जनसम्पर्क समितिबाट पनि केन्द्रीय समितिमा प्रतिनिधित्व रहने व्यवस्था मिलाइएको शिवाकोटीको भनाइ थियो।
साथै सभापति गगन थापाले भर्अुअल रूपमा कार्यक्रमलाई सम्बोधन गर्दै नेपाली जनसम्पर्क समितिहरूको अधिवेशन प्रारम्भ गरिएको बताए।
‘जापानबाट नेपाली जनसम्पर्क समितिको अधिवेशन सुरू भएको छ, अब कोरिया र अमेरिकामा अधिवेशन हुनेछ। पार्टीले प्रतिनिधिहरू पनि पठाइसकेको छ,’ सभापति थापाले भने, ‘जनसम्पर्क समितिहरूको अधिवेशन अवरूद्ध नहुने वातावरण बनाउँछौं।’
उनले पार्टीभित्र देखिएका मतभेद संवादमार्फत हल गरिने बताउँदै अधिवेशनहरूमा सबैलाई सहभागी हुन आग्रह गरेका छन्।
‘जनसम्पर्क समितिबाट आउने प्रतिनिधि आफूनिकट आउँछन् कि आउँदैनन् भनेर विगतमा हिसाबकिताव गर्ने गरिन्थ्यो, त्यसले अनावश्यक विवाद निम्त्याएको थियो, अब जनसम्पर्क समितिको भूमिका सच्याउँछौं, अब विधानअनुसार नै केन्द्रीय समितिमा ७ जना जनसम्पर्क समितिमध्येबाट प्रतिस्पर्धा भएर आउने व्यवस्था गरिएको छ,’ सभापति थापाले भने, ‘पहिले मतदाता मात्रै रहने व्यवस्था थियो अब केन्द्रीय समिति चुनाव लड्न र प्रतिनिधित्व गर्न मिल्छ।’
उनले अन्तर्राष्ट्रिय समन्वय समिति पनि बनाएको र यसबाट पार्टीको नीति निर्माणमा भूमिका खेल्न सक्ने पनि बताए।
उनले १५ औं महाधिवेशनतर्फ पार्टी जुटिसकेको पनि बताए। ‘कार्यतालिका आइसकेको छ, १५ औं महाधिवेशनमा जुटिसकेका छौं,’ उनले भने। कांग्रेसले असोजमा १५ औं महाधिवेशन गर्दैछ।
