प्रमुख प्रतिपक्षी दल नेपाली कांग्रेसले प्रदेश मन्त्रीलाई थुन्ने पूर्वाधार विकास मन्त्री सुनिल लम्सालको टिप्पणीमा प्रश्न उठाएको छ।
सोमबार प्रतिनिधि सभाको बैठकमा प्रमुख प्रतिपक्षी दल नेता भिष्मराज आङ्देम्बेले मन्त्री लम्सालको अभिव्यक्ति ग्राह्य हुन नसक्ने बताएका हुन्।
'प्रदेश मन्त्रीलाई थुन्छु, मेयरलाई कारबाही गर्छु भन्नुभएको छ। यो ग्राह्य हो सभामुख महोदय?,' आङदेम्बेले प्रश्न उठाए, 'हामीले के बिर्सनु हुँदैन भने प्रदेश मन्त्री पनि जनताबाट निर्वचित भएका आएका हुन्। मेयर पनि जनताबाट निर्वाचित भएका हुन्। हामी पनि जनताबाट निर्वाचित भएर आएका हौँ। यसका पनि समाधान खोज्ने कानुनी दायरा होलान्। कानुनी बाटोबाट निदान नखोजेर... यसअघि खुट्टा भाँचिदिन्छु भन्ने अभिव्यक्ति... अहिले आएर यो खाले अभिव्यक्तिले मुलुक कहाँ जाँदैछ।'
यसबारेमा आङदेम्बेले सभामुखको ध्यान आकृष्ट पनि गराएका छन्।
आइतबार तनहुँको शुक्लागण्डकी नगरपालिकामा सत्तारूढ राष्ट्रिय स्वतन्त्र पार्टीका नेता तथा कार्यकर्ताहरूसँग भेटघाट क्रममा मन्त्री लम्सालले जनताको काम नगर्ने मेयर तथा प्रदेश मन्त्रीहरूलाई कारबाही दायरामा ल्याउने बताएका थिए।
'कुनै मेयरले काम गर्नुभएन, जनतालाई अपहेलना गर्नुभयो, सेवामा लापरबाही गर्नुभयो भने त्यो केसमा पनि हामीलाई जानकारी गराउनुहोला। मेयरलाई पनि कारबाही गर्छौं हामी, प्रदेशका मन्त्रीले त्यो भन्नुभयो भने प्रदेशका मन्त्रीलाई नै थुन्छौं हामी, चिन्तै लिनुपर्दैन,' पूर्वाधार विकास मन्त्री लम्सालले भने, 'काम गर्नुपर्यो, काम गराउनुपर्यो।'
मन्त्री लम्सालले यसअघि धादिङमा सडक आयोजना अनुगमन क्रममा बिजुलीका पोल समयमै नहटाएका निर्माण व्यवसायीलाई खुट्टा भाँच्न निर्देशन दिएपछि उनको आलोचना भएको थियो।
मन्त्री लम्सालले पटक पटक थुन्ने लगायतका अभिव्यक्ति दिने गरेका छन्।
