नेपाल कम्युनिस्ट पार्टी (एमाले) का केन्द्रीय सदस्य सुहाङ नेम्वाङले जारी केन्द्रीय कमिटीको बैठकमा पार्टीको वर्तमान अवस्थालाई वस्तुनिष्ठ रूपमा स्वीकार गर्दै सुधारको नयाँ मार्गचित्र बनाउनुपर्नेमा जोड दिएका छन्।
बैठकमा आफ्नो धारणा राख्दै नेता नेम्वाङले अग्रजहरूले परिवर्तनका लागि गरेको कष्टसाध्य र असाधारण सङ्घर्षको इतिहास गौरवपूर्ण रहेको भन्दै उक्त गौरवशाली इतिहास र आन्दोलनलाई पुस्तौँसम्म अजम्बरी राखिराख्न आजको यथार्थ र सत्यलाई स्वीकार गर्नुपर्ने बताए।
गौतम बुद्ध, फ्रेडरिक नित्से, चे गेभारा र माओत्सेतुङका भनाइहरू उद्धृत गर्दै उनले कमजोरी र गल्ती स्वीकार नगर्नु वैचारिक र साङ्गठनिक विनाशको बाटो भएको उल्लेख गरे।
पार्टीभित्रको वर्तमान स्थितिलाई औँल्याउँदै नेम्वाङले भने, 'हामीले यहाँ भनिरहे जस्तो ‘हाम्रो आन्दोलन र पार्टीको अवस्था ठिकठाक छैन।’ हामीप्रतिको विश्वास र भरोसा टुट्दै गएको छ। ठिक छ भनेर असत्य बोल्नु हुन्न, क्रान्तिकारीहरूले त झूटको सामना गर्दा पनि झूटको सहारा लिनु हुन्न।'
पार्टी र आन्दोलनमा रोग लागेको र अनुहारमा फोहोर जमेको उल्लेख गर्दै उनले गल्ती लुकाउनु भनेको रोग लुकाउनु जस्तै भएको र यसले अन्ततः विनाश नै ल्याउने चेतावनी दिए।
अब पनि पुनर्गठित भएर नयाँ उचाइमा हिँड्न नसके अग्रजहरूको गौरवमय कथा सुन्ने नयाँ पुस्ता बाँकी नरहने उनले बताए।
उनले समाज र नयाँ पुस्ताको विश्वास जित्ने सही मार्गचित्र बनाउन वा नयाँ पुस्तालाई विश्वास गरेर जिम्मेवारी दिनसमेत आग्रह गरे।
'मेरो अनुरोध छ, समाज र नयाँ पुस्ताको विश्वास जित्ने नयाँ मार्गचित्र बनाउनुहोस्। हामी त्यहाँ कसरी हिँड्ने, त्यो भनिदिनुहोस् अथवा हामी नयाँ पुस्तालाई विश्वास गर्नुहोस्,' उनले भने, 'हामी पार्टी र आन्दोलनलाई सारा बन्धन र षड्यन्त्रबाट बाहिर निकालेर तपाईंहरूको गौरवमय इतिहासको कथा समाज, पुस्ता र दुनियाँलाई भन्छौँ। त्यो मार्गचित्र र आत्मविश्वास हामी नयाँ पुस्तासँग छ।'
-1790072299.jpg)
-1746009348.jpg)
