चीन भ्रमणमा जान लागेका सत्तारूढ राष्ट्रिय स्वतन्त्र पार्टी (रास्वपा) का सांसदहरूले आज प्रधानमन्त्री बालेन शाहसँग छलफल गरेका छन्।
कात्तिक २९ देखि मंसिर १० गतेसम्म हुने चीन भ्रमणबारे जानकारी गराउन आफूहरूले प्रधानमन्त्री शाहसँग भेटवार्ता गरेको मुख्य सचेतक कबिन्द्र बुर्लाकोटीले बताए।
प्रधानमन्त्रीसँगको भेटमा भ्रमणलाई प्रभावकारी बनाउने र नेपाल–चीन सम्बन्धलाई थप प्रगाढ बनाउने विषयमा छलफल भएको उनले जानकारी दिए।
प्रधानमन्त्रीले नेपाल र चीनबीचको विशिष्ट सम्बन्धलाई अझ मजबुत बनाउने तथा भ्रमणलाई नेपालको राष्ट्रिय हितमा केन्द्रित गर्न निर्देशन दिएको बुर्लाकोटीले बताए।
‘प्रधानमन्त्रीले नेपाल र चीनबीचको विशिष्ट सम्बन्धलाई अझ मजबुत बनाउने तथा भ्रमणलाई नेपालको राष्ट्रिय हितमा केन्द्रित गर्न निर्देशन दिनुभएको छ,’ उनले भने।
प्रधानमन्त्री शाहले विशेषगरी चीनबाट प्रविधि, व्यापार, आर्थिक विकास, पर्यटन तथा कृषिको आधुनिकीकरणका क्षेत्रमा लिन सकिने लाभबारे अध्ययन र सहकार्य गर्न आग्रह गरेका छन्।
प्रधानमन्त्रीले उक्त भ्रमणलाई केवल पर्यटकीय भ्रमणमा सीमित नराखी दुई देशको हित र नेपालको विकासमा योगदान पुर्याउने उद्देश्यसहित अघि बढाउनुपर्नेमा जोड दिएको बुर्लाकोटीले बताए।
महामन्त्री विपिन आचार्य, गणेश पराजुली, हरि ढकाल, कविन्द्र बुर्लाकोटी, लिमा अधिकारी आचार्य, समीक्षा बाँस्कोटा, सागर ढकाल, सुशान्त वैदिक, रीमा विश्वकर्मा, रमेशकुमार सापकोटा, डा धनञ्जय रेग्मी, गजला शमिम मिकरानी, श्रीराम न्यौपाने, डा राम लामा, पुनमकुमारी अग्रवाल, डा आनन्दबहादुर चन्द, डा सुजाता तामाङ, पुष्पाकुमारी चौधरी, अरविन्द शाह र रत्ना थापा कात्तिक २९ गतेदेखि चीन भ्रमणमा जान लागेका हुन्।
