धादिङबाट चोरीको मोटरसाइकलसहित एक युवा पक्राउ परेका छन्।
असोज २२ गते भएको मोटरसाइकल दुर्घटनाको अनुसन्धानका क्रममा मोटरसाइकल चोरीको भएको खुलेको थियो।
मोटरसाइकल धादिङ बेनिघाट रोराङ गाउँपालिका वडा नम्बर ३ स्थित पृथ्वी राजमार्गमा दुर्घटनामा परेको थियो।
धादिङ प्रहरीका अनुसार चोरी पश्चात सो मोटरसइकलमा प्रदेश नं ३ ३-००२-००३ प नम्बरको प्लेट राखेर चलाईंदै आइएको थियो।
वास्तविक नम्बर बा १० प ६९२१ भएको मोटरसाइकल यही असोज ६ गते काठमाडौं महानगरपालिका वडा नम्बर २६ टमेलको भगवानबाहालमा सडकमा पार्किङ गरिएको स्थानबाट हराएको थियो।
यसरी चोरिएको मोटरसाइकललाई नम्बर प्लेट परिवर्तन गरी तनहुँ बन्दीपुर गाउँपालिका वडा नम्बर २ पार्च घर भइ हाल गोरखाको गण्डकी गाँउपालिका वडा नम्बर ८ बस्ने २१ वर्षीय रोमन क्षेत्री भनिने नारायण भण्डारीले चलाउँदै आएका थिए।
पक्राउ परेका भण्डारीलाई धादिङ प्रहरीले आवश्यक कारवाहीका लागि महानगरीय ट्राफिक प्रहरी महाशाखा काठमाडौं पठाएको छ।