सुर्खेतमा १६ वर्षीया किशोरीको बलात्कारपछि हत्या भएको घटनामा अनुसन्धान गर्न केन्द्रीय अनुसन्धान ब्युरो (सिआइबी) को टोली खटिएको छ।
सिआइबीबाट प्रहरी निरीक्षकको कमाण्डमा टोली बिहीबार सुर्खेततर्फ आएको जिल्ला प्रहरी कार्यालय सुर्खेतका प्रमुख एवं एसपी सुधिरराज शाहीले जानकारी दिए।
'हामीले पनि अनुसन्धान गरिरहेका छौं, हाम्रो अनुसन्धानमा सघाउनका लागि सिआइबीको टोली आएको हो,' उनले भने।
जिल्ला प्रहरी कार्यालय सुर्खेतले छुट्टै टोली बनाएर घटनाको अनुसन्धान गरिरहेको छ।
साथै घटना अनुसन्धानमा कुनै तथ्यहरू नछुटून् भनेर सिआइबीको टोली पुगेको एसपी शाहीले बताए।
गुर्भाकोट नगरपालिका-६ घर भएकी १६ वर्षीया किशोरी वीरेन्द्रनगर-१ मा आमासँग बस्दै आएकी थिइन्। उनका बुवा विदेशमा थिए। बिहीबार मात्र घर आइपुगेका छन्।
कक्षा-११ मा पढ्ने उनी फागुन २३ गते बिहान वीरेन्द्रनगर-४ को जनजागरण सामुदायिक वनमा साथीहरूसँग मर्निङवाक जाने भनेर निस्किएकी थिइन्।उनी बिहान ८ बजेतिर निस्केकी थिइन्।
त्यसपछि किशोरसँग भेट भएको र वनमा उनले जबरजस्ती करणी गरेको आरोप छ। जबरजस्ती करणी गर्दा नाबालिकाको यौनांगमा चोट लागेको प्रहरीको अनुसन्धानमा खुलेको छ।
किशोरीको अत्यधिक रक्तस्राव भएपछि ती किशोरले आफ्ना साथीहरूलाई बोलाएको प्रहरीसमक्ष बयान दिएका छन्। अचेत अवस्थामा रहेको खबरपछि प्रहरी पनि घटनास्थलमा पुगेको थियो।
पछि बालिकालाई प्रादेशिक अस्पतालमा लगिएको थियो। त्यहाँ उनलाई चिकित्सकले मृत घोषणा गरेको हो। प्रहरीले घटनामा चार जना किशोरलाई नियन्त्रणमा लिएर अनुसन्धान गरिरहेको छ।
प्रहरी कार्यालयमा चारै जनाविरूद्ध किटानी जाहेरी परेको छ। उक्त जाहेरी परेपछि प्रहरीले आइतबार नै जबरजस्ती करणी र कर्तव्य ज्यान कसुरमा म्याद थप गरी अनुसन्धान प्रक्रिया अघि बढाएको छ।
पहिलो पटक ६ दिन म्याद थप भएकोमा बिहीबार पुन: म्याद थपका लागि जिल्ला अदालत लगिएको छ।
-1746009348.jpg)
