तिलगंगा आँखा प्रतिष्ठानले विश्व जलविन्दु सप्ताह तथा जलविन्दु दिवस २०२६ विभिन्न कार्यक्रम गरेर मनाएको छ।
प्रतिष्ठानले मार्च ७ तारिखदेखि १४ तारिखसम्म जनचेतनामूलक कार्यक्रम, बिरामीको अवस्था अनुसार निःशुल्क आँखा उपचार, परामर्श सेवा तथा संचार र सामाजिक सञ्जालमार्फत जानकारीमूलक सामग्री प्रसारण गर्ने कार्य गरिरहेको छ।
मार्च १२ तारिख अर्थात आजको दिन विश्वभर जलविन्दु दिवस मनाइन्छ।
विश्वव्यापी रूपमा अन्धोपनको प्रमुख कारणहरूमध्ये जलविन्दु रोगलाई मानिन्छ।
जलविन्दु आँखाको यस्तो रोग हो जसले बिस्तारै दृष्टिको नसालाई क्षति पुर्याउँदै जान्छ र समयमै पहिचान तथा उपचार नभएमा जीवनभर अन्धोपनसमेत हुन सक्छ। यस रोगको सुरूआती चरणमा विशेष लक्षण नदेखिने भएकाले नियमित आँखा परीक्षण अत्यन्त आवश्यक मानिन्छ।
तिलगंगा आँखा प्रतिष्ठानको सन् २०२५ को तथ्यांक अनुसार प्रतिष्ठानमा जलविन्दु सम्बन्धी सेवा लिन आएका बिरामीहरूको संख्या १५,२९४ रहेको थियो।
उमेर समूह अनुसार तथ्याङ्क हेर्दा ०–१४ वर्ष उमेर समूहको संख्या ८४० रहेको,१५–५९ वर्ष उमेर समूहमा ८,३२० तथा ६० वर्ष वा सोभन्दा माथिको उमेर समूहमा ६,१२४ बिरामीले जलविन्दु सम्बन्धी सेवा लिएको प्रतिष्ठानले जनाएको छ।
जलविन्दु देखिएका र यसको उपचार गराएका बिरामीहरुको लिङ्गका आधारमा हेर्दा महिला तथा पुरुषको संख्या उस्तै–उस्तै छ।
यस तथ्याङ्कले जलविन्दु सबै उमेर समूहका व्यक्तिमा देखिन सक्ने र विशेषगरी युवा तथा वृद्ध उमेर समूहमा यसको जोखिम बढी हुने तथ्यलाई उजागर गर्ने प्रतिष्ठानले जनाएको छ।
प्रतिष्ठानले विशेषगरी ४० वर्षभन्दा माथिका व्यक्तिहरू, परिवारमा जलविन्दु भएको इतिहास भएका व्यक्तिहरू, मधुमेह तथा उच्च रक्तचाप भएका व्यक्तिहरूलाई नियमित आँखा परीक्षण गराउन जोड दिएको छ।
समयमै पहिचान र उपचारले जलविन्दुबाट हुने दृष्टि क्षति रोक्न महत्वपूर्ण भूमिका खेल्ने भएकाले सबैलाई सचेत रहन प्रतिष्ठानको सुझाव छ।
-1746009348.jpg)
