खुलामञ्चस्थित दुईमाजु मन्दिर परिसरमा खोलिएका अबैधानिक पसलहरूमा ताला लगाइएको छ। मुक्त टुँडिखेल अभियानका संरक्षण अभियन्ताहरूको पहलमा शुक्रबार ताला लगाइएको हो।
गुठी संस्थानले तिहार सकिएलगतै पसल हटाउन आदेश दिएको थियो। संस्थानका कार्यकारी प्रमुख नारायण चौधरीले तिहारअघि नै पसल खाली गराउन पत्र पठाएका थिए। त्यही पनि व्यापारीहरूले पसल नहटाएपछि अभियन्ताहरूले विरोध गरेका थिए। टुँडिखेल अतिक्रमणविरूद्ध सार्वजनिक अभियानअन्तर्गत पहिलो चरणमा दुईमाजु मन्दिर परिसर खाली गराउन अभियन्ताहरूले खोजेका हुन्।
वर्षौंदेखि टुँडिखेल मिचेर बसेको सेना र खुलामञ्च मासेर बसपार्क र अबैधानि संरचना बनाउने काठमाडौं महानगरपालिकालाई अतिक्रमण छाड्न शान्तिपूर्ण दबाब दिइन तीन महिनासम्म प्रत्यक शनिबार विभिन्न कार्यक्रम भइरहको छ। दुईमाजु परिसर खाली गराउने प्रयास त्यसैको पहिलो कडी हो। पसल खाली गराउन नगरपालिकाकी उप-मेयर हरिप्रभा खड्गीको पनि उपस्थिति थियाे।
दुईमाजु मन्दिर परिसर ठूलो शक्तिपीठ हो जहाँ राजासमेत शक्ति लिन आउँथे। अहिले पनि यहाँबाट विभिन्न जात्रा सञ्चालन हुँदै आएका छन्। यही ठाउँमा पसल खाेलेका व्यापारीले भने याे ठाउँलाइ अझै संरक्षण गर्दै आएको बताएका थिए।
उनीहरूले प्रत्येक महिना पाँच हजार बुझाउँदै पसल थापेका हुन्। आफूसँग पसल खोल्ने कागजातसमेत भएकाले बैधानिक रूपमै पसल खोलेको भन्दै उनीहरू हट्न मानिरहेका थिएनन्।
गुठी संस्थानले अमृता भट्टराई भन्ने व्यक्तिलाई महिनाको १५ हजार रूपैयाँमा मन्दिर परिसर भाडामा दिएको थियो। भट्टराईले सम्झौताविपरीत पसलहरू भाडामा लगाएकी थिइन्। उनैले पसलेहरूसँग भाडा उठाउँदै आएकी हुन्।
काठमाडौं महानगरपालिकाले भ्यू टावरसहितको बहुउद्देश्यीय भवन बनाउने निर्णय गरेयता पुरानो बसपार्क खुलामञ्च सरेको थियो। त्यसपछि सुरू अतिक्रमण सिलसिला जारी छ।