शिवरात्रिको भोलिपल्टै यस्तो देखियो बेहुलीझैं सिंगारिएको पशुपति क्षेत्र (फोटोफिचर)

निशा भण्डारी

काठमाडौं, फागुन १०

महाशिवरात्रिमा पशुपति क्षेत्रमा छुट्टै रौनक हुन्छ। त्यसमा पनि झन् यसपालि भने पशुपतिको स्वरूपनै परिवर्तन भएको थियो।

कारण – यस वर्ष पशुपतिनाथ मन्दिर र परिसरलाई करिब २ करोड बराबरको फूलले सजाइएको थियो।

पशुपतिनाथ मन्दिर र परिसरलाई साँच्चै बेहुलीझैं सजाइएको थियो। विभिन्न देशबाट ल्याइएका फूलबाट पशुपतिनाथ मन्दिरको मुख्य प्रवेशद्वार, शिवलिंग, शिवको बाहन साँढे सजाइएको थियो।

तर महाशिवरात्रिको भोलिपल्टै पशुपति क्षेत्रको स्वरूप भने फेरिएको छ। अहिले ती सबै फूल चोरी भएका छन्। पशुपति क्षेत्र अहिले कुरूप देखिएको छ।

शनिबार बिहान त्यहाँ पुग्दा पशुपतिनाथ र परिसरमा सजाइएका फूल अधिकांश त चोरी भइसकेका थिए। कोही भने एउटा दुइटा भन्दै सजाइएका फूल लिँदै थिए।

त्यहाँ खटिएका सुरक्षाकर्मी पनि मान्छेका त्यस्ता व्यवहार देखेर हैरान थिए। उनीहरूले आफूले भ्याएसम्म मान्छेलाई सम्झाउँदै फूल नटिप्न आग्रह गर्दै थिए।

‘बाँदरले बरू चुँडेर लगेन मान्छे भने यस्ता हुँदा रहेछन्,’ मान्छेका व्यवहार देखेर त्यहाँ खटिएका एक सुरक्षाकर्मीले भने,‘पहिला आहा भन्छन् अनि पछि चुँडेर लैजान्छन् कतिलाई सम्झाउनु! त्यो त बुझ्नुपर्ने कुरा हो नि।’

यस वर्षको महाशिवरात्रिमा १० लाख बढी दर्शनार्थीले पशुपतिनाथको दर्शन गरेको पशुपति क्षेत्र विकास कोषको दाबी छ।

शनिबार बिहानैबाट पशुपतिनाथ क्षेत्र विकास कोषका कर्मचारी सरसफाइमा जुटेका छन्।

हेर्नुस् तस्बिर :