दाङको तुलसीपुरमा एक १५ वर्षीया किशोरीमाथि सामूहिक बलात्कार भएको छ।
तुलसीपुर उपमहानगरपालिका वडा नं. १८ अम्बाखोलीस्थित सामुदायिक वनमा ती किशोरीमाथि स्थानीय ५ जना युवाले सामूहिक बलात्कार गरेको जोहरी परेको छ।
स्थानीय अम्बाखोली सामुदायिक वनमा जेठ ६ गते रातको ९ बजे ती किशोरीमाथि सामूहिक बलात्कार भएको जाहेरी पीडित बालिकाले आफन्तको सहयोगमा इलाका प्रहरी कार्यालय तुलसीपुरमा किटानी जाहेरी दिएकी छन्।
इप्रका तुलसीपुरका प्रवक्ता चक्रडम्मर पालले अभियुक्तमध्ये स्थानीय २१ वर्षीय पारस खड्का र २० वर्षीय विकास विकलाई पक्राउ गरिएको जानकारी दिए।
प्रहरी निरीक्षक पालले अन्य ३ जना अभियुक्त फरार रहेको र उनीहरूको खोजी भइरहेको बताए। फरार अभियुक्तहरूको नाम भने प्रहरीले सार्वजनिक गरेको छैन।
उनका अनुसार खड्काले फोन गरेर ती किशोरीलाई रातको समयमा घर नजिकैको सामुदायिक वनमा काम छ भन्दै बोलाएका थिए।
उनी त्यहाँ आएपछि लुकेर बसेका सबैले जबरजस्ती आफूमाथि करणी गरेको ती किशोरीले जाहेरीमा उल्लेख गरेकी छन्।
