प्रतिनिधि सभाको महिला तथा सामाजिक समितिले स्वास्थ्यकर्मीहरुलाई मर्यादित र संयमित हुन आग्रह गरेको छ।
समितिको आज बसेको बैठकले स्वास्थ्यकर्मीहरुले बढी भत्ता मागेको, बिरामीसँग मर्यादित व्यवहार नगरेको जस्ता विषयमा ध्यानाकर्षण भएको जनाएको हो।
‘कोरोना संक्रमण देखिएका जिल्लाबाट उपचारका लागि आएका अन्य रोगका बिमारी अपरेशन थिएटरमा पुगेपछि अन्तै रिफर गरिनु, स्वास्थ्य सेवा प्रदान गर्न स्वीकार नगर्नु, कोरोना संक्रमितको उपचारमा सहभानुभूतिपूर्ण व्यवहार नेदाखाउनु, जारी कार्यविधिहरुको अपब्याख्या गरी अत्याधिक भत्ता माग गर्नु, बिरामीमाथि मर्यादित व्यवहार नगरिनु, उपचार पाउने बिरामीको अधिकारको सम्मान गर्न नसक्नु, एम्बलेन्सले संक्रमित बोक्न नचाहनुजस्ता क्रियाकपालले स्वास्थ्यकर्मीको मर्यादा बढाउँदैन’ समितिको निर्णयमा भनिएको छ।
समितिले स्वास्थ्यकर्मीको सुरक्षामा पनि चासो देखाएको छ। तर सुरक्षाको प्रबन्ध पश्चात पनि स्वास्थ्यकर्मीहरु कर्तव्य विमुख हुन खोजेको टिप्पणी समितिले गरेको छ।
‘व्यक्तिगत सुरक्षामा अनिवार्य रुपमा ध्यान दिइनु पर्दछ तर सुरक्षाको आवश्यक प्रबन्ध पश्चात पनि कर्तव्य विमुख हुन खोज्ने क्रियाकलाप पेशागत मर्यादाका लागि घातक छ’ समितिको निर्णयमा भनिएको छ, ‘यस्ता विषयमाथि समितिले गम्भिरतापूर्वक हेरिरहेको छ।’
समितिले गर्भवती र सुत्केरीको मृत्यु भएकोमा समेत चासो देखाएको छ।
‘स्वास्थ्य प्रणाली कोरोनामा केन्द्रित हुँदा नियमित तथा अत्यावश्यक स्वास्थ्य सेवा माथिको पहुँचमा न्यूनता आएको छ। जसबाट गर्भवती, सुत्केरी, दुर्घटनामा परेका व्यक्तिहरु, बालबालिका, जेष्ठ नागरिकहरु बढी प्रभावित भएका छन् र आवश्यक उपचारको अभावका कारण ज्यान गुमाउनेको संख्या पनि बढ्दो क्रममा छ’ समितिले सरकारलाई निर्देशन दिँदै भनेको छ, ‘बन्दाबन्दी र स्वास्थ्य सेवाको सीमित उपलब्धता जीवन क्षतिको कारण बन्नु हुन्न भन्ने हाम्रो सर्वस्वीकार्य मान्यतालाई आत्मसाथ तथा जीवन क्षति हुने अवस्था आउनै नदिनेगरी व्यवस्थापन गर्न र आधारभूत स्वास्थ्य सेवाको पहुँचलाई पुर्नस्थापित गर्न निर्देशन गर्दछ।’
समितिले समयमा उपचार नपाएका कारण गर्भवती, सुत्केरी तथा बालबालिकाको अकालमा जीवन क्षति भैरहेको देखिएको जनाएको छ।
‘यो संख्या क्रमिकरुपमा बढ्दो छ। मातृमृत्युदर अनपेक्षित रुपमा वृद्धि भएको छ’ समितिले निर्णयमा भनेको छ, ‘अन्य रोगको बिरामीहरुले उपचार नपाएका कारण ज्यान गुमाउनेको संख्या पनि वृद्धि भएको छ। विषम परिस्थितिमा पनि नागरिको जीवन रक्षा देशको पहिलो दायित्व हो।’
समितिले आफू खुसी क्वारेन्टिनबाट भाग्ने, परीक्षणका लागि आउने स्वास्थ्यकर्मी, सुरक्षाकर्मीमाथि अमर्यादित व्यवहार गर्ने जस्ता कामहरुले कोरोना रोकथाममा सहयोग नपुर्याउने बताएको छ।
समितिको सभापतिमा नेकपाकी सांसद निरु देवी पाल छिन्।