तनहुँको विभिन्न ठाउँमा पहिरोले ज्यान गुमाउनेको संख्या ७ जना पुगेको छ भने ५ जना बेपत्ता छन्। त्यसैगरी ३ जना भने घाइते छन्।
हराइरहेकाहरूको खोजी कार्य जारी रहेको र घाइतेको तनहुँ र पोखरामा उपचार भइरहेको तनहुँ प्रहरी प्रमुख एसपी अरुण पौडेलले बताए।
पहिरोमा पुरिएर तनहुँको व्यास नगरपालिका-९ माझफाँटका कमला थापा र उनका परिवारका ३ जनाको मृत्यु भएको छ। जसमा कमलाका २४ वर्षीय छोरा मनोज थापा र छोरी २१ वर्षीय अञ्जना थापा छन्। सोही स्थानका ७० वर्षीय वृद्धा मैतकुमारी घर्तीको पनि पहिरोमा परेर ज्यान गएको छ।
यस्तै, म्याग्दे गाउँपालिका ६ बेलौतेडाँडामा पहिरोमा परेर घाइते भएकी १७ वर्षीय लक्ष्मी विक दमौलीस्थित रत्नहरी अस्पतालमा उपचारका क्रममा ज्यान गएको छ।
तनहुँकै ऋषिङ गाउँपालिका-८ पल्ट्याङका ३० वर्षीय भेषबहादुर थापा र उनका बुहारी १९ वर्षीया मनिसरा थापाको पनि ज्यान गएको छ।
पहिरोमा परेका पल्ट्याङकै मृतक भेषबहादुरका श्रीमती २९ वर्षीया नानुमाया थापा, भाइ २२ वर्षीय महादेव थापा र छोरी ५ वर्षीय अमिषा थापा हराइरहेका छन्।
उनीहरूको खोजी जारी रहेको तनहुँ प्रहरीले जनाएको छ।
व्यास नगरपालिका-९ माझफाँटमा पनि पहिरोमा परेका २ जना अझै फेला पर्न सकेका छैनन्।
व्यास-९ माझफाँटका २० वर्षीय राजेश थापा र व्यास-११ ओडारेका करिब ४५ वर्षीय पदमबहादुर भुजेल पनि पहिरोमा परेर हराइरहेका छन्।
पहिरोमा परेर घाइते भएका ऋसिङ ८ पल्ट्याङका ६० वर्षीय ज्योतिमाया थापा र व्यास-९ का ५० वर्षीय केशव थापाको उपचार गर्न पोखरा ल्याइएको छ भने अर्की घाइते व्यासकै झनुमाया कुँवरको दमौलीमा उपचार भइरहेको छ।
बाढी र पहिरोका कारण दर्जनौं मानिस विस्थापित भएको र उनीहरूको उद्धार र क्षतिको विवरण संकलन भइरहेको तनहुँ प्रहरी प्रमुख एसपी पौडेलले बताए।
-1746009348.jpg)
