प्रहरीले आफ्नै काकाको हत्या गरेर फरार भएका व्यक्तिलाई पक्राउ गरेको छ।
जिल्ला प्रहरी कार्यालय कास्कीले ओखलढुङ्गा सुनकोशी गाउँपालिका ५ बान्द्रेका ४३ वर्षीय इन्द्र बहादुर तामाङलाई पक्राउ गरेको हो। उनलाई लमजुङको मध्यनेपाल नगरपालिका २ सोतिपसलबाट पक्राउ गरेको एसपी जीवनकुमार श्रेष्ठले जानकारी दिए।
उनले आफ्ना काका टंकबहादुर तामाङको हत्या गरेको प्रहरी समक्ष स्वीकारिसकेका छन्। उनीहरूको घर ओखलढुङ्गा भएपनि तीन वर्षदेखि पोखरामा बस्दै आएका थिए।
टंकबहादुर पोखरामा ज्याला मजदुरीको काम गर्थे। उनी पोखरा महानगरपालिका २० स्थित मजुवा बिसौना- बिजयपुर कोट पर्यटकीय पैदल मार्ग निर्माणको काम गर्दै थिए। गत वैशाख २१ गते बिहान ६ बजे मजुवा जंगल छेउमा उनको शव फेला परेको थियो। उनको टाउको तथा अनुहारमा गम्भीर चोटपटक समेत देखिएको थियो।
टंकबहादुर पोखरामा इन्द्रबहादुर र पन्थबहादुर तामाङसँगै बस्थे। तर घटनापछि भने इन्द्रबहादुर फरार थिए।
प्रहरीको अनुसन्धान अनुसार उनीहरूले अघिल्लो रात मदिरा सेवन गरेका थिए। मदिरा सेवनपछि भाँडा खसालेको विषयमा टंकबहादुर र इन्द्रबहादुरबीच झडप भएको एसपी श्रेष्ठले बताए।
दुई जनाबीच झडप भएपछि ‘सधै झगडा गरेर सुत्न दिँदैनन् भन्दै पन्थबहादुर त्यहाँबाट निस्केका थिए, भोलिपल्ट उठेर जाँदा पन्थबहादुरले टंकबहादुरको शव देखेका थिए भने इन्द्रबहादुर फरार थिए। अहिले इन्द्रबहादुरमाथि प्रहरीले कर्तव्य ज्यान मुद्दामा थप अनुसन्धान अघि बढाएको छ।