सोलुखुम्बुबाट तीन वटा बन्दुकसहित एक जना पक्राउ परेका छन्।
सोताङ गाउँपालिका वडा नम्बर १ का ३४ वर्षीय दिलबहादुर भन्ने गंगाबहादुर गिरी पक्राउ परेका हुन्। उनकाे समूहका अन्य फरार छन्।
पावैस्थित सामुदायिक वनमा गत शनिबार साँझ ६ बजे गोली चलेको थियो। वनमा चार राउन्ड गोली चलेपछि प्रहरीको टोली खटिएको थियो।
आवाज आएको स्थानमा खटिएको टोलीले चारैतिर घेरा हाल्यो। तर शिकारी समूहका धेरैजसो व्यक्तिहरू बन्दुक फ्याँकेर फरार भए।
उनीहरुमध्ये गिरीलाई प्रहरीले लखेटेर पक्राउ गरेको जिल्ला प्रहरी कार्यालयका प्रहरी नायब उपरीक्षक (डिएसपी) कबित कटवालले जानकारी दिए। उनका अनुसार गिरी शिकारी समूहका हुन्।
उनीहरूले लामो समयदेखि वनमा शिकार खेल्ने गर्थे।
'उनीहरूको शिकार खेल्ने दुई वटा टोली छ। भिरालोमाथि एउटा टोली बस्ने, अर्को टोली बन्दुक बोकेर तल बस्ने,' डिएसपी कटवालले भने,' माथिबाट ठूला-ठूला ढुंगा जंगलमा झार्ने र तलतिर बसेर गोली हानेर शिकार गर्ने गरेको पायौं।'
'भालुलाई लखेट्नमात्रै पनि उनीहरूले गोली चलाउने गरेको पायौं,' उनले भने।
प्रहरीले घटनास्थलबाट तीन वटा भरूवा बन्दुक, आठ सय ग्राम बारूद, एक किलो फलामको टुक्रा, टर्चलाइटमा प्रयोग हुने सात वटा ब्याट्री लगायत सामान बरामद गरेको छ।
घटनामा संलग्न अन्य केही व्यक्तिहरू फरार छन्। उनीहरूको खोजतलासी भइरहेको कार्यालयले जनाएको छ।
'उनीहरूमध्ये ६ जनाको पहिचान भइसकेको छ। हामीले व्यापक खोजी थालेका छौं,' डिएसपी कटवालले भने,' फोनमार्फत ट्रेसिङ गरिरहेका छौं। छिट्टै समात्छौं।'
सोलुखुम्बुको जंगलहरूमा मृग, बँदेल, भालु, कालिज जस्ता संरक्षित जंगली जनवार र पंक्षीहरूको चोरी शिकारी हुने गरेको पाइन्छ। त्यस सम्बन्धी प्रहरीले सुक्ष्म रूपमा अनुसन्धान गरिरहेको छ।
