भन्सार चोरी पैठारी नियन्त्रणमा लागेको पर्सा प्रहरीले भारतबाट अवैध रुपमा भित्र्र्याइएको स्कार्पिओसहित चार वटा मोटरसाइकल बरामद गरेको छ।
कोरोना महामारीको बेला जारी निषेधाज्ञाको क्रममा भारतबाट भित्र्र्याइको स्कार्पिओसहित प्रहरीले चार वटा मोटरसाइकल बरामद गरेको हो।
पर्सा प्रहरी प्रवक्ता प्रहरी नायब उपरीक्षक ओमप्रकाश खनालका अनुसार सोमबार बिआर०५पी ९२६९ नम्बरको स्कार्पिओ, बिआर०५इ २९०८, ना१८प ७९०१, ना१६प ७८५४ र ना२प २४३० नम्बरका मोटरसाइकल बरामद गरिएको हो।
प्रहरीले दिउँसो करिब १ बजे भारतीय स्कार्पियो गाडी बरामद गरेको थियो। अस्थायी प्रहरी पोष्ट मनवाबाट खटिएको टोलीले पर्सागढी नगरपालिका-१ मनवा बजारबाट स्कार्पिओ गाडी बरामद गरेको थियो।
उक्त स्कार्पिओलाई प्रहरीले २५ लाख मूल्यांकन गरी भन्सार कार्यालयमा बुझाएको खनालले बताए।
यसैगरी, लत्ताकपडा बोकेर आएका ती मोटरसाइकल रोक्न खोज्दा चारै जना मोटरसाइकल चालक सामान छोडेर भागेका थिए।
ती मोटरसाइकलमा ६ लाख ९४ हजार ३५० मूल्य बराबरको भन्सार छलेको कपडा थियो। सबै मोटरासाइकललाई कारबाहीका लागि भन्सार बुझाइएको खनालले बताए।
‘तस्करी नियन्त्रणमा हाम्रा सबै युनिट परिचालित छन्, निषेधाज्ञाको बेला पनि तस्करी गरेर सामान भित्र्र्याउने गरेको देखिएको छ,’ पर्साका प्रहरी उपरीक्षक बेलबहादुर पाण्डेले भने, ‘तस्करी नियन्त्रणका लागि हामी सक्दो प्रयास गरिरहेका छौं।’
पर्सा सुरक्षा र तस्करीको हिसाबले चुनौतीपूर्ण जिल्ला मानिन्छ।
प्रकाशित मिति: सोमबार, वैशाख २०, २०७८, २०:०८:००
