कञ्चनपुरमा भान्जाको लठ्ठी प्रहारबाट मामाको मृत्यु भएको छ।
गएराति आपसी विवाद हुँदा भीमदत्त नगरपलिका-१० का ४२ वर्षीय वीरराम लुहारको उनकै २२ वर्षीय भान्जा गिरधारी लुहारले कुटपिट गर्दा मृत्यु भएको प्रहरीले जनाएको छ।
जिल्ला प्रहरी कार्यालय कञ्चनपुरका प्रहरी प्रवत्ता तथा प्रहरी नायब उपरीक्षक सिद्धराज न्यौपानेले मामा-भान्जाबीच आपसी विवाद हुदाँ गिरधारीले लठ्ठी प्रहार गर्दा वीरराम गम्भीर घाइते भएको बताए।
घाइते लुहारलाई उपचारका लागि महाकाली प्रादेशिक अस्पताल पुर्याउनेबित्तिकै डाक्टरले मृत घोषणा गरेको प्रहरी नायब उपरीक्षक न्यौपानले बताए।
घटनापछि मृतकका भान्जा गिरधारी लुहारलाई प्रहरीले नियन्त्रणमा लिएको छ।
घटनाको थप अनुसन्धान भइरहेको प्रहरीले जनाएको छ।
उनको शव पोष्टमार्टमका लागि अस्पतालमा राखिएको छ।
