संखुवासभामा शंकास्पद वस्तु फेला परेको छ।
चैनपुर नगरपालिका वडा नम्बर ६ स्थित बसपार्क नजिकै शंकास्पद वस्तु फेला परेको इलाका प्रहरी कार्यालय चैनपुरका प्रहरी निरीक्षक योगराज खतिवडाले जानकारी दिए।
उनका अनुसार सो वस्तु बिहीबार अपरान्ह ४ बजे फेला परेको हो। एउटा बट्टामा टेपले टालेको अवस्थामा सो वस्तु फेला परेको खबर पाएपछि प्रहरीको टोली खटिएको थियो।
वस्तुको चेक गर्न जिल्लाको खाँदबारीबाट सेनाको डिस्पोजल टोली बोलाइएको प्रहरी निरीक्षक खतिवडाले बताए।
शंकास्पद वस्तु फेला परेको ठाउँ इलाका प्रहरी कार्यालयबाट ३०० मिटरको दूरीमा मात्रै रहेको उनले बताए।
शंकास्पद वस्तु फेला परेको ठाउँमा १ नम्बर प्रदेश सरकारको पर्यटन मन्त्रालयले पार्क बनाउने योजना बनाएको छ।
‘बसपार्कभन्दा अलि माथि हो। पार्क बनाउन लागेको ठाउँमा हो। हाम्रै अफिसबाट ३०० मिटर दूरीमा छ। हेर्दा विस्फोटक वस्तु जस्तो देखिन्छ,’ उनले भने, ‘अहिले हामी बसेको ठाउँमा पहिले द्वन्द्वको बेलामा सशस्त्र प्रहरी बल बसेको थियो। त्यतिबेला ठूलो भीडन्त भएको ठाउँ पनि हो। त्यसैले त्यतिबेलै को हो कि भन्ने पनि छ।’
अहिले प्रहरीको टोली सुरक्षाको लागि खटिएको छ।
प्रकाशित मिति: शुक्रबार, पुस ३०, २०७८, १५:३७:००
