काठमाडौं महानगरपालिकाले नियमविपरीत बनाएका नर्भिक अस्पतालको संरचना हटाउन थप समय दिने भएको छ।
काठमाडौं महानगरपालिकाका मेयर बालेन शाहले मंगलबार दिउँसो थापाथलीस्थित नर्भिक अस्पताल पुगेर निरीक्षण गर्ने क्रममा अस्पतालले बनाएको संरचना हटाउन थप समय दिने बताएका हुन्।
मंगलबार दिउँसो निरीक्षण गर्न नर्भिक अस्पताल पुगेका शाहले नर्भिक अस्पतालका प्रशासकीय अधिकृत र अध्यक्ष राजेन्द्रबहादुर सिंह लगायतसँग कुराकानी गरेका थिए।
उक्त कुराकानीको क्रममा अस्पतालका प्रशासन पक्षले पहिले नै सम्झौता गर्दा केही भएको खण्डमा तीन महिनाको समय दिनुपर्ने प्रावधान भएको बताएको थियो।
उक्त प्रतिक्रियामा बालेनले कति समय दिने भन्ने कुरा प्राविधिकहरूले अध्ययन गरेर बताउने बताएका थिए।
‘१५ दिन समय दिने, ३० दिन दिने वा एक महिना समय दिने हो त्यो प्राविधिकहरूले भन्ने छन्,’ उनले भने, ‘तर प्राविधिकहरूले मिति नै तोकेर भन्नुहुनेछ।’
शाहले सम्झौताविपरीतका संरचना भत्काउनुपर्ने बताए। तर प्रशासनले भने उक्त संरचना सम्झौता अनुरूप नै भएको दाबी गरेको छ। अहिले भएका संरचनाहरू अस्पतालले अस्थायी भएको बताएको छ।
‘महानगरमा संरचनाहरू कुनै पनि स्थायी र अस्थायी हुँदैन,’ शाहले भने, ‘सबै संरचना, संरचना नै हुन्।’
प्रशासनले ट्रसलाई संरचना भन्न नमिल्ने जिकिर गरेको थियो।
यस्तै, उक्त जग्गामा अक्सिजन प्लान्ट, बिजुली, पानीजस्ता अत्यावश्यक वस्तुहरूको सप्लाई भइरहेको हुनाले बिरामीहरूलाई असर पर्ने अध्यक्ष सिंहले आज पत्रकार सम्मेलनमा बताएका थिए।
यस्तै, बालेनले अस्पताल नजिकै अक्सिजन राख्न पाउने व्यवस्था भए/नभएको समेत जिज्ञासा राखेका थिए।
मंगलबार बिहान पत्रकार सम्मेलन गर्दै नर्भिक अस्पतालका अध्यक्ष राजेन्द्रबहादुर सिंहले अस्पतालले बनाएको संरचना तत्कालै भत्काउन सम्भव नरहेको बताएका थिए।
सिंहले २०६५ सालमा नेपाल सरकारसँग सम्झौता गरी जग्गा लिजमा लिएको र उक्त सम्झौतामा जग्गाको स्वरूप बिगार्न नपाइने मात्र उल्लेख भएको बताए।
‘बाटो नभएको जग्गा वार्षिक ३३ हजार रुपैयाँ भाडा दिने गरी सम्झौता भएको थियो,' उनले भने, 'प्रत्येक वर्षमा १० प्रतिशत भाडा बढ्ने सम्झौता भएको थियो।’
सम्झौताअनुरूप अहिले लिजमा लिएको जग्गाको भाडा वार्षिक ८४ हजार पुगेको सिंहले बताए।
सम्झौता बमोजिम भाडा र नियमित कर अस्पतालले तिर्दै आएको र जग्गामा लिएको १२ वर्ष भइसकेको र अझै आठ वर्ष बाँकी रहेको सिंहले बताएका थिए।
यस्तै सिंहले महानगरले खाली गर्न भनेको उक्त जग्गाबाट अत्यावश्यक वस्तुहरूको सप्लाई भइरहेको बताएका थिए।
‘उक्त जग्गा अक्सिजन प्लान्ट, बिजुली, पानीजस्ता अत्यावश्यक वस्तुहरूको सप्लाई भइरहेको छ,’ उनले भने, ‘ती सबै कुरा तुरून्त हटाउँदा अस्पतालको क्रिटिकल केयरमा रहेका बिरामीहरूलाई तलमाथि भए को जिम्मेवार हुने?’
सोमबार मेयर बालेन शाह कुनै अग्रिम जानकारीबिनै अस्पताल पुगेर भत्काउन सूचना दिएको सिंहले बताएका थिए।
‘मेयर शाह आएर सूचना टाँसेर गएपछि मैले हिजै उहाँलाई पत्राचार गरेर तत्काल भत्काउने अवस्था नरहेको भनेको थिएँ’, सिंहले भने, ‘तर मेरो पत्रको जवाफ आएको छैन।’
सोमबार काठमाडौंका मेयर बालेन शाह नर्भिक अस्पताल नै पुगेर २४ घन्टाभित्र उक्त जग्गा खाली गर्न सूचना दिएका थिए।
यो पनि:
नर्भिक अस्पताल भन्छ: बनाएका संरचना तत्कालै भत्काउन सकिँदैन
