ललितपुर महानगरपालिका र डिएभी सुशील केडिया विश्व भारती स्कुलबीच शुक्रबार बिहान ९ बजे बैठक बसेको छ। विद्यालय व्यवस्थापन समितिले स्कुलमै दुई पक्षीय बैठक बसाएको हो।
लेखक तथा निर्देशक उपेन्द्र सुब्बाले सामाजिक सञ्जालमा लेख्दै डिएभी स्कुलले आफ्नी छोरीलाई अपमानजनक व्यवहार गरेको बताएका थिए।
विद्यार्थी र अभिभावकलाई बोलाएर अपमानजनक व्यवहार गरेको विषयमा ललितपुर महानगरपालिकाले स्कुलसँग कुराकानी गर्ने भनेको थियो। यही क्रममा शुक्रबार महानगर र स्कुलबीच बैठक बसेको हो।
शुक्रबारको बैठकमा महानगरका प्रतिनिधि, स्कुल पक्ष र अभिभावक संघका पदाधिकारीका साथै थप दुई जना अभिभावकलाई सहभागी गराइएको ललितपुर महानगरपालिका, शिक्षा शाखाका अधिकृत नवराज रिजालले जानकारी दिए। उपेन्द्र सुब्बा र उनको परिवारलाई भने बोलाइएको थिएन।
रिजालका अनुसार सुब्बाकी छोरीलाई भनेको कुरा सुब्बाले गलत तरिकाले बुझेको स्कुलले बैठकमा बताएको छ।
'पठाओ चलाएर खान्छ भनेको घटना भने दुई वर्ष अगाडिको रहेछ। स्कुलले भनेको कुरालाई गलत तरिकाले परिवारले बुझेको भनेर स्कुल पक्षले भनेको छ,' रिजालले भने, 'स्कुलले परामर्श दिनेक्रममा नपढेका मान्छेले त पठाओ चलाएर खाइरहेका छन् भन्ने दृष्टिकोणले भन्न खोजेको भन्ने कुरा गरेको छ।'
थप बैठक र अध्ययनबाट कमीकमजोरी कसको हो भनेर विद्यालय व्यवस्थापन समितिले चाँडै रिपोर्ट निकाल्ने पनि उनले बताए।
'कमजोरी स्कुल पक्षको हो कि होइन भन्नेबारे सम्भवतः भोलि नै जानकारी बाहिर आउँछ होला,' महानगरका शिक्षा शाखा प्रमुख रिजालले भने।
डिएभी स्कुलले छोरीलाई अपमानजनक व्यवहार गरेको भन्दै निर्देशक सुब्बाले सोमबार फेसबुकमा लामो स्टाटस लेखेका थिए। उनले आफ्नी छोरीलाई डिएभीका उप–प्रधानाध्यापकसहित अन्य दुई शिक्षकले गिज्याएको, होच्याएको र हेपेको भनेका थिए।
'यो बच्चालाई हामी पढाउन सक्दैनौं। अन्त स्कुल लानू। यहाँ यिनलाई सिकाउने कुनै औषधि छैन। यिनले पढ्नै सक्दैन भनेछन्,' स्टाटसमा सुब्बाले लेखेका थिए।
यसअघि पनि स्कुलले आफ्नी छोरीलाई अपमानजनक व्यवहार गरेको भन्दै उनले लेखेका थिए, 'पहिला पनि जोशी सरले मेरी छोरीले पढेर खान सक्दैन, बरु एउटा स्कुटी किन्दिनू, पठाओ चलाएर खान्छ भनेका थिए।'
लेखक तथा निर्देशक सुब्बाले आफ्नी छोरीलाई डिएभी स्कुलमा कक्षा दुईदेखि पढाउँदै आएका छन्। कक्षा ९ मा पुगेपछि स्कुलले यसरी अपमानजनक व्यवहार गर्नुमा उनले 'एसइई परीक्षामा छोरीले राम्रो अंक ल्याउन नसकेर विद्यालयको साख घट्न सक्ला' भन्ने अनुमान गरेका छन्। पढाइ मात्र हेरेर छोरीको मूल्यांकन गर्नुमा उनी स्कुलको कमजोरी ठान्छन्।
